ShYU Belarýsti uıymǵa engizý protsesin bastady

SAMARQAND. QazAqparat – Tıimdilikti, ózara túsinistik pen serpindilikti kórsetetin Shanhaı yntymaqtastyq uıymynyń óz geografııalyq qamtýyn keńeıtýi uıymǵa qajettilik baryn aıǵaqtaıdy.

Bul pikirdi ShYU-ǵa múshe memleketter basshylary keńesiniń otyrysynda Ózbekstan prezıdenti Shavkat Mırzıeev aıtty, dep habarlaıdy QazAqparat agenttiginiń menshikti tilshisi.

«ShYU ashyqtyq qaǵıdattaryn berik ustanýynyń arqasynda qatysýshy elder arasyndaǵy ózara tıimdi qatynastardy nyǵaıtady jáne halyqaralyq yntymaqtastyqty tereńdetedi. ShYU-nyń quramy keńeıip keledi, bizdiń seriktestik baılanystarymyz damyp jatyr», - dedi Ózbekstan basshysy.

Ol Iran Islam Respýblıkasynyń ShYU-nyń tolyqqandy múshesi retindegi mindettemeleri týraly, Egıpet Arab Respýblıkasy men Katarǵa dıalog boıynsha áriptester mártebesin berý týraly memorandýmdarǵa qol qoıýdyń tarıhı mańyzdylyǵyn atap ótti.

«Odan bólek, biz Belarýs Respýblıkasyna ShYU-nyń tolyq quqyly múshesi mártebesin, al Bahreın Koroldigine, Kýveıt Memleketine, Maldıv Respýblıkasyna, Birikken Arab Ámirlikterine jáne Mıanma Odaǵy Respýblıkasyna – dıalog boıynsha áriptester mártebesin berý rásimderin bastaý sheshimderin qabyldap jatyrmyz», - dep málimdedi Shavkat Mırzıeev.

«ShYU-nyń geografııalyq aýqymyn keńeıtý - tıimdilikti, ózara túsinistik pen dınamızmdi kórsetetin bizdiń uıymnyń qajettilik baryn taǵy bir aıǵaqtaıdy», - dep atap ótti Ózbekstan Prezıdenti.

Aıta keteıik, 15-16 qyrkúıek kúnderi Samarqand qalasynda Shanhaı Yntymaqtastyq Uıymynyń sammıti ótedi. Samarqand sammıti uıym qyzmetindegi tarıhı jıyn bolmaq. Bul otyrys koronavırýs pandemııasy bastalǵannan keıingi sońǵy úsh jyldaǵy ShYU basshylarynyń alǵashqy kezdesýi boldy.

Bul sharaǵa alǵash ret 14 eldiń basshylary, sondaı-aq 10 bedeldi halyqaralyq uıym basshylary qatysady. Kún tártibine sáıkes, uıymnyń qyzmetin damytý jáne keńeıtý jónindegi qomaqty qujattar paketin qabyldaý kózdelgen, bul ShYU úshin jańa dáýirdiń bastamasy bolady.

Mádıbek Jánibekov