ShYU bas hatshysy: Saılaýdyń legıtımdiligine kúmán keltiretindeı zańsyzdyq tirkelgen joq

ASTANA. QazAqparat – Shanhaı yntymaqtastyq uıymynyń bas hatshysy Chjan Mın Ortalyq saılaý komıssııasynyń kezekten tys Prezıdent saılaýynyń aldyn ala qorytyndysyn jarııalaǵannan keıin mıssııanyń jumysyn túıindedi, dep habarlaıdy QazAqparat tilshisi.

Bas hatshynyń aıtýynsha, 17-20 qarasha aralyǵynda ShYU mıssııasy Qazaqstan Respýblıkasynyń shaqyrýymen kezekten tys Prezıdent saılaýyna baıqaý mısssııasyn atqarǵan. Quramyna 18 baıqaýshy kirgen delegatsııaǵa 7 memlekettiń ókilderi, ShYU-nyń hatshylyq ókilderi, óńirlik qurylymdarynyń ókilderi kiripti.

«ShYU ókilderiniń baıqaýy Astana qalasy men Aqmola oblysynyń aýmaǵynda 22 ýchaskeni qamtydy. Mıssııa músheleri bıýlletender daıyndaý, daýys berý jáshikterin plombalaý protsesterine qatysty. Sondaı-aq, saılaý komıssııalarynyń múshelerimen, saılaýshylarmen, áleýmettik baıqaýshylarmen keń aýqymda ashyq suhbat qurdyq. Osy protsess kezinde saılaý ótkizýge daıyndyq tártippen, jaqsy uıymdastyrylǵanyn tirkedik. Bári qalypty jaǵdaıda, tártipke saı ótti. Ekinshiden, búkil saılaýshylar úlken belsendilik tanytty», - dedi Chjan Mın.

Onyń sózine qaraǵanda, daýys berý protsedýrasyn iske asyrýǵa arnalǵan búkil jaǵdaı jasalǵan.

«Egde jastaǵy azamattar men múmkindigi bar jandarǵa arnaıy jaǵdaı jasaldy. Saılaý komıssııalarynyń ókilderi daýys berýshiler qoıǵan suraqtarǵa óte tolyqqandy jaýap berip jatty. Sondaı-aq, baıqaýshylar tarapynan suraqtarǵa túsinikteme berdi. Men búkil saılaý ýchaskesine kirgen kezde óz qujatymdy kórsetýge týra kelgenin atap ótýim kerek», - degen ShYU bas hatshysy saılaý ýchaskelerinde baıqaý júrgizý kezinde birde-bir kedergige tap kelmegenin erekshe atady.

«Sondyqtan Qazaqstan tarapy saılaý protsesine baqylaý júrgizýge qajetti búkil jaǵdaıdy jasady dep aıtýǵa bolady. Sondaı-aq, atalǵan saılaýdyń ashyqtyǵy baıqalyp turdy. Bul qorytyndylardyń bárin bizdiń mıssııa músheleri jeke baıqaýlary negizinde shyǵardy. Ulttyq zańnamanyń saılaý legıtımdiligine kúmán keltiretindeı buzylýyn bizdiń mıssııa tirkegen joq. Bizge eshqandaı shaǵym nemese eskertý túsken joq. Jeke baıqaýymyz negizinde mıssııa ótken saılaýdy ashyq, senimdi ári demokratııalyq dep tanıdy. Qazaqstan Prezıdentiniń saılaýy Qazaqstandaǵy saılaý eldiń ózi qabyldaǵan halyqaralyq mindettemelerge saı boldy. 10 mınýn buryn Ortalyq saılaý komıssııasy osy saılaýǵa halyqtyń qatysý kórsetkishin jarııalady. Bul biz kórgen ahýalmen tolyq sáıkesedi», - dedi Chjan Mın.
Aıta keteıik, Ortalyq saılaý komıssııasy Prezıdent saılaýynyń aldyn ala nátıjesin jarııalaǵan bolatyn.