ShYU aıasyndaǵy kelisimderi Qazaqstannyń Azııa naryǵyn ıgerýine yqpal etedi

ALMATY. QazAqparat - Shanhaı Yntymaqtastyq Uıymy 18-sammıti aıasyndaǵy kezdesý barysynda Qytaı men Qazaqstan tarapynan qol jetkizilgen kelisimder Qazaqstannyń kópvektorly saıasatyn aıqyndaı túsedi. Ekonomıka ǵylymdarynyń doktory Atamurat Shámenov osyndaı pikir bildirdi, dep habarlaıdy QazAqparat tilshisi.

Onyń oıynsha, Elbasynyń Qytaıǵa sapary Qazaqstannyń ekonomıkalyq saladaǵy kópvektorly saıasatynyń aıqyn kórinisi bolyp otyr.

«Qazaqstan Eýroodaqpen jaqsy qarym-qatynasta. Qazaqstanǵa eń kóp ınvestıtsııa quıǵan el - Nıderlandy. Al, Shanhaı Yntymaqtastyq Uıymyna kóbine Azııanyń alpaýyttary kiredi. ShYU alańy Qazaqstandy Azııa naryǵyna shyǵaratyn altyn kópir bolmaq. Azııa elderin Qazaqstan áli ıgere qoıǵan joq. Bul áleýeti mol jańa naryq. Agrarlyq salaǵa kelsek, bir ǵana Úndistannyń suranysynyń ózi Qazaqstanǵa kóp tabys ákeledi. Úndistannyń múmkindigi óte joǵary el. Onda dári-dármek, ІT salasy jaqsy damyǵan. Bul oraıda agrarlyq sala Qazaqstan ekonomıkasynyń draıveri bolatynynan kúmán týmaıdy. Pákistannyń ózinde toqyma, tamaq ónerkásibi jaqsy damyǵan. Máselen, Qytaı men Túrkııa taýarlaryna balama retinde Pákistannyń arzan taýarlary tasymaldansa da jaqsy bolar edi. Sondyqtan ShYU aıasyndaǵy yqpaldastyqtyń bolashaǵy óte jarqyn», - dedi Atamurat Shámenov.

Onyń pikirinshe, kelisim jasalǵanda Qazaqstannyń múddesi tyńǵylyqty qaralýy kerek. «Kelisimshart jasasqanda óz múddemizdi birinshi kezekte oılaýymyz kerek», - dedi A.Shámenov.

Aıta ketý kerek, QR Prezıdenti Nursultan Nazarbaev Qytaı Halyq Respýblıkasynyń Tóraǵasy Sı Tszınpınmen keńeıtilgen quramda kezdesý ótkizgen bolatyn.

Kelissózder barysynda Qytaı tarapy Qazaqstannyń ekologııalyq turǵydan taza aýyl sharýashylyǵy ónimin óz naryǵyna jetkizýge, energetıka salasyndaǵy, munaı-gaz keshenindegi, sondaı-aq mádenı-gýmanıtarlyq baılanystar, jańa tehnologııalar men tsıfrlandyrý salalaryndaǵy ekijaqty yntymaqtastyqty tereńdetýge múddelilik tanytty.