ShYU: 2024 jyly Qytaıda terrorızmge qarsy birlesken oqý-jattyǵý ótedi

ASTANA. QazAqparat – Shanhaı yntymaqtastyq uıymyna múshe elderdiń laskestik áreketterge qarsy kúres is-qımyl áreketterine arnalǵan kezekti otyrysy Qytaıda ótedi, dep habarlaıdy QazAqparat tilshisi.

Búgin Astanada Qazaqstannyń tóraǵalyǵymen Shanhaı yntymaqtastyq uıymynyń (ShYU) óńirlik terrorızmge qarsy qurylym keńesiniń 40-shy otyrysy ótti. Otyrys qorytyndysy boıynsha qatysýshy elder birlesken málimdeme jasady.

«Búgingi keńeste terrorızmge, ekstremızmge jáne separatızmge qarsy kúres máseleleri boıynsha buryn qabyldanǵan sheshimderdiń iske asyrylý barysy qaraldy. Lańkestik áreketterge qarsy is-qımyl jáne saraptamalyq toptardyń ózekti máseleler boıynsha jumys josparlary bekitildi. Áýe jolaýshylary týraly aldyn ala aqparat júıelerin paıdalanýdyń halyqaralyq tájirıbesin zerdeleý, sondaı-aq ShYU memleketteriniń osy saladaǵy ulttyq tájirıbesin taldaý qorytyndylary maquldandy», - dedi QR Ulttyq qaýipsizdik komıteti tóraǵasynyń orynbasary Rýslan Seısembaev birlesken málimdemeni oqı otyryp.

Málimdemede aıtylǵandaı, otyrysta terrorızmdi qarjylandyrý arnalarynyń jolyn kesý jáne anyqtaý, sondaı-aq qarýdyń zańsyz aınalymyna qarsy is-qımyl jónindegi yntymaqtastyq máseleleri de sóz boldy.

«Úndistan aýmaǵynda praktıkalyq yntymaqtastyqty kúsheıtý úshin ınternet jelisin terrorıstik jáne ekstremıstik maqsattarda paıdalanýdyń jolyn kesý boıynsha praktıkalyq semınar men terrorızmge qarsy oqý-jattyǵý josparlanǵan. 2024 jyly QHR aýmaǵynda terrorızmge qarsy birlesken oqý-jattyǵý ótkizý týraly sheshim qabyldandy. Ekstremıstik ıdeologııaǵa qarsy is-qımyl boıynsha birlesken yntymaqtastyq baǵdarlamasyn ázirleý bastaldy. ShYU elderiniń lańkestik taqyrybyna arnalǵan kezekti otyrysty Qytaıda ótkizýdi josparlap otyrmyz», - dedi Rýslan Seısembaev.