Shyrshany ornatý men bezendirýde qaýipsizdik erejelerin eskerý qajet - TJD

ALMATY. QazAqparat – Almaty qalasynda jyl saıyn Jańa jyl merekesi kezinde 10-15 órt tirkeledi. Osy oraıda, qalalyq tótenshe jaǵdaılar departamentinen shyrshany ornatý men bezendirýdegi qaýipsizdik erejeleri eskertildi, dep habarlaıdy QazAqparat tilshisi.

Shyrshalar men olardyń áshekeılerin ornatý kezinde órt qaýipsizdigin saqtaý maqsatynda birqatar erejeni eskerý qajet.

«Birinshi, aǵashtar ornyqty negizge ornatylyp, úı-jaıdan shyǵýǵa tosqaýyl bolmaýy kerek.

Ekinshi, shyrshanyń butaqtary qabyrǵa men tóbeden kem degende 1 metr qashyqtyqta ornalasýy qajet.

Úshinshi, transformatorsyz elektr jelisin paıdalanǵan kezde kerneýi 12 Voltke deıingi shamdardy qoldanyńyz. Shamdardyń ruqsat etilgen qýaty 25 Vattan aspaýy kerek;

Tórtinshi, eger jaryqtandyrý kezinde aqaýlyq anyqtalsa (symdardyń qyzýy nemese ushqyn shyǵarý), onda gırlıandyny dereý elektr jelisinen ajyratyńyz.

Besinshi, zaqymdanǵan nemese búlingen, órt týdyrýy múmkin elektr jelilerin paıdalanbańyz», - delingen departamenttiń baspasóz qyzmeti taratqan málimdemede.

Aıta ketsek, Almatyda 25 jeltoqsannan bastap tótenshe jaǵdaılar departamenti men polıtsııa qyzmetkerleri pırotehnıkalyq buıymdar satylatyn oryndarda reıd júrgizip jatyr. Pırotehnıkalyq buıymdardy ótkizý qaǵıdalaryn buzǵan 23 adamǵa ákimshilik shara qabyldandy. QR zańnamasynyń talaptaryna saı kelmeıtin 262 jıyntyq (200 kg astam) pırotehnıkalyq buıym tárkilendi.