Shyńjańda bir táýlikte shamamen 500 myń adam koronavırýsqa test tapsyrdy

BEIJІŃ. QazAqparat – Qytaıdyń Shyńjań Uıǵyr avtonomııaly aýdanynyń (ShUAR) Boro-Tala-Mońǵol avtonomııalyq óńiriniń bıligi bir táýlik ishinde 500 myń jergilikti turǵyndy koronavırýsqa tekserdi.

Bul týraly ótken dúısenbide jergilikti densaýlyq saqtaý komıtetiniń basshysy Sýn Tao málim etti, dep habarlaıdy QazAqparattyń menshikti tilshisi.

Bir táýlik ishinde Qytaıdyń soltústik-batysyndaǵy ShUAR-dyń Boro-Tala-Mońǵol avtonomııalyq aımaǵy turǵyndarynyń barlyǵy derlik koronavırýsqa test tapsyrdy. Ondaǵy halyq sany – shamamen 500 myń. Aımaq bıligi ótken jeksenbi kúni Alashańqaı qalasynda standartty nýkleın qyshqylyn tekserý kezinde úsh adamnyń koronavırýspen sımptomsyz aýyryp júrgenin anyqtady, artynsha jappaı testileý ótkiziletini týraly málimdedi. Sol kúni vırýspen sımptomsyz aýyryp júrgen úsh adam men olarmen tyǵyz baılanysta bolǵan 88 adam karantınge jabyldy.

Aımaqtyń densaýlyq saqtaý jónindegi komıtetiniń málimdemesine sáıkes, 16 tamyz saǵat 08:00-degi jaǵdaı boıynsha, testileý nátıjeleriniń bári teris bolyp shyqqan. Barlyǵy 498 myń adamnan synamalar alyndy, olardyń qatarynda Alashańqaı qalasynyń 15 myńnan asa turǵyny bar. Qazirgi kezde Alanshankoýda COVID-19-ǵa testileýdiń ekinshi raýndy bastaldy.

Alashańqaı qalasynda úsh sımptomsyz tasymaldaýshy anyqtalǵannan keıin jeksenbiden bastap karantın sharalary kúsheıtildi. BAQ-tyń habarlaýynsha, «Alashańqaı qalasynyń negizgi aýdandaryn jabyq túrde basqarý engizilgen», sonymen qatar «shekarada jabyq tsıkl boıynsha barlyq protsesti basqarýmen» jáne ımporttalýshy taýarlardyń muqııat dezınfektsııadan ótýimen baılanysty sharalar da kúsheıtildi.

16 tamyz kúngi saǵat 24:00-degi jaǵdaı boıynsha, Shyńjańda koronavırýs juqtyrýdyń jańa jaǵdaılary men basqa sımptomsyz tasymaldaýshylar anyqtalmady.

Alashańqaı qalasynda Eýrazııalyq transkontınentaldyq kópirdiń mańyzdy transporttyq haby bolyp tabylatyn «Alashańqaı» iri qurlyqtaǵy shekara ótkeli ornalasqan.

Sońǵy derekter boıynsha, qurlyqtyq Qytaıdyń aýrýhanalarynda koronavırýs juqtyrǵan shamamen 2 myńǵa jýyq naýqas jatyr. El boıynsha, «delta» shtamy órshigen tustan bastap epıdemıologııalyq qaýiptiń joǵary deńgeıi 29 turǵyn aımaqta, al orta deńgeıi 100-ge jýyq aımaqta tirkelgen.

Rýslan Súleımenov