Shynaıy patrıotızm memlekettik rámizderdi qurmetteýden bastalady - Baýyrjan Baıbek
Almaty ákimi Baýyrjan Baıbek shynaıy patrıotızm memlekettik rámizderdi qurmetteýden bastalatyndyǵyn aıtty.
«Biz, almatylyqtar memlekettik rámizderdiń, Konstıtýtsııanyń, ulttyq valıýtanyń Almatyda bekitilgeni úshin maqtanamyz. Bul - bizdiń týǵan ólkemizdiń, jalpy elimiz tarıhynyń altyn paraqtary. Memlekettik rámizderdiń tereń maǵynasy men máni bar. Olar ulttyq rýhty, tarıh pen mádenıetti, elimizdiń qaıtalanbas ǵalamat beınesin aıshyqtaıdy. Prezıdent aıtyp ótkendeı, jeke ulttyq kodqa aınalyp, kez kelgen ultty ómirsheń ultqa aınaldyrady. Sonymen birge, memlekettik rámizder Elbasy jarııalaǵan jańarý rýhynyń baǵa jetpes irgetasy bolýmen qatar, halqymyzdy óreli bıikterge jeteleıdi. Al, bul - ashyqtyq, ózgeriske daıyn bolý, bolashaqqa umtylý. Táýelsiz Qazaqstannyń basty maqsaty - básekege qabiletti damyǵan elderdiń qataryna enip, qýatty da aıbyndy elge aınalý», - dedi B.Baıbek.
Ol sonymen qatar óskeleń urpaq úshin memlekettik rámizderdiń tárbıelik máni orasan ekenin de aıtty.
«Óskeleń jas urpaqqa qajetti barlyq jaǵdaıdy jasaý -bizdiń kezek kúttirmeıtin mindetterimiz. Ózderińiz bilesizder, Memleket basshysynyń tapsyrmasy boıynsha 2017 jyl Almatyda «Jastar jyly» dep jarııalandy. Osyǵan oraı, megapolıste «Jastarǵa 2020 jylǵa deıin qoldaý kórsetýdiń Jol kartasy» jasaldy. Ashyqtyq, esep berý qaǵıdalaryn basshylyqqa ala otyryp, osynaý qujatty jasaý barysynda biz jastardyń usynystaryn negizge aldyq. Jol kartasy qaladaǵy jastar uıymdarynyń arasynda qyzý talqylandy, Qoǵamdyq keńeste maquldanyp, qala máslıhatynda bekitildi», -dedi qala basshysy.
Atap óterlik jaıt, Jol kartasynda sapaly bilim, turǵyn úı, jumyspen qamtý, túrli bastamalarǵa qoldaý bildirý sııaqty búgingi kúni jastardy tolǵandyratyn máselelerdiń bári qamtylǵan.
Merekelik is shara kontserttik baǵdarlamamen jalǵasty. Almatylyq jastar úshin «Mısterıons», «KeshYou» toptary, Tóreǵalı Tóreáli, Kamshat Joldybaeva, Álı Okapov, Turar Rahımberlın, Janna Orynbasarova, Ayree óner kórsetti.
Búgin Qazaqstanda Memlekettik rámizder kúni. 1992 jyldyń 4 maýsymynda Elbasy N. Á. Nazarbaev elimizdiń memlekettik rámizderin - Týdy, Eltańba men Ánurandy bekitken edi.