Shynaıy oqıǵaǵa negizdelgen «Qazbat» fılmi prokatqa shyǵady

NUR-SULTAN. QazAqparat – 21 qarasha kúni Qazaqstan kınoteatrlaryna «Aıý Sınema» qazaqstandyq kompanııasy men «Qazaqstan» telearnasy túsirgen «Qazbat» kórkem fılmi prokatqa shyǵady, dep habarlaıdy QazAqparat.

Fılm 1995 jyldyń 7 sáýiri kúni bolǵan shynaıy oqıǵa negizinde túsirilgen. Bul kúni Qazaqstan ishki áskeriniń 7-inshi erkin rotasynyń áskerı qyzmetshileri Tájikstannyń Pshıharvsk shatqalynda irgeles ornalasqan tarap sodyrlarynyń tutqıyldan shabýylyna tap boldy.

Týyndyda 19-20 jas aralyǵyndaǵy 4 keıipker týraly baıandalady. Bul – tájik-aýǵan shekarasynda jaýyngerlik mindetti oryndaǵan barlyq áskerı qyzmetshilerdiń jıyntyq obrazy. Kartınada sondaı-aq óz qyzmetin abyroımen atqarǵan, qolastyndaǵylarǵa qamqor bolyp, olardan naǵyz er azamattardy tárbıelep shyǵarǵan Marat Ahmetov, Berik Omarov, Qaırat Sátbaev syndy jáne ózge de ofıtserlerdiń obrazyn jetkizetin vzvod komandıry bar.

«Qazbat»-ty túsirý ıdeıasy QR Ulttyq ulanynyń Bas qolbasshysy, general-leıtenant Rýslan Jaqsylyqovqa tıesili. Rejısseri – Asqar Uzabaev. Basty qoıýshy-operator – Maksım Zadarnovskıı.

Fılmde talantty akterlar Dáýren Serǵazın men Rınat Doshybekov, kınoındýstrııaǵa jańadan qadam basqan - Halyq Rahat, Dııas Myrzahmet, Sharıfbek Zakırov jáne Indıra Shynbolatqyzy oınaıdy.

QR Ulttyq ulanynyń baspasóz qyzmetinen málim etkendeı, «Qazbat»-tyń televızııalyq nusqasy atalmysh shaıqastyń 25 jyldyǵyna oraı kelesi jyldyń 7 sáýiri kúni «Qazaqstan» arnasynan kórsetiledi.