Shymkenttiń jańa bıýdjeti belgili boldy
«Qalanyń bıylǵy - jańa mártebeniń berilýine deıingi bıýdjeti 137 mıllıard. Sonyń 64 mıllıardy qalanyń derbes tabysy da, 35-34 mıllıard teńgesi oblystyq bıýdjet esebinen toltyrylyp otyr, al 18 mıllıard teńgeni sýbventsııalar qurap otyr. Qalanyń derbes bıýdjetin 183 mıllıard teńge deıin arttyrýdy josparlap otyrmyz, odan tys sýbventsııalar da bolady ári respýblıkadan da suraımyz. 2019 jylǵa qaraı bastapqy bıýdjet 183 mıllıard bolady. Ákimdikte bes basqarma - tabıǵatty qorǵaý, memlekettik sáýlet-qurylys baqylaý, ana men bala, din isteri, densaýlyq saqtaý, arhıv jáne tsıfrlandyrý basqarmalary qurylady. Shymkentti «aqyldy» qalaǵa aınaldyrý úderisi jalǵasa beredi», - deıdi Shymkent ákiminiń orynbasary Gúljan Qurmanbekova.
Qosymsha qarajattar jol qurylysy, jańa mektepter, baspanalar, demalys oryndaryn, jolaıryqtar salýǵa, avtobýs parkin jańartýǵa jumsalady.
«Qurylys qarqyny kúsheıtiledi. Respýblıkalyq transfertterdi tikeleı alatyn bolamyz. Eń aldymen baspana máselesin sheshýimiz kerek. 2017 jyly 238 myń sharshy metrdiń baspanasyn ıelerine tapsyrdyq, al bıyl osy kórsetkishti 457 myń sharshy metrge jetkizý josparda bar», - deıdi Shymkent qalasy qurylys bóliminiń basshysy Ábilseıit Rabaev.
Shymkentte 55 mektep boı kóteredi. Mıllıoner qalada jylyna 10 myńǵa jýyq sábı dúnıege keledi. Ákimdik respýblıkalyq mańyzy bar qala mártebesiniń berilýi Shymkenttiń ekonomıkalyq ahýalyn jaqsartatynyna senimdi. Áleýmettik jáne baspanamen qamtý salalalaryna bólinetin qarajat artady, gaz, sý, elektr tartý sekildi ınfraqurylym qurylystary boıynsha jumystar kúsheıtiledi. Jyl sońyna deıin qalada birde-bir asfalt jabyndysyz jol qalmaýy tıis.