Shymkenttiń munaı óńdeý zaýyty muqtaj jandarǵa qaıyrymdylyq sharasyn ótkizdi

ShYMKENT. QazAqparat – Qazaqstan Respýblıkasy Táýelsizdiginiń 28 jyldyǵy qarsańynda Shymkenttiń munaı óńdeý zaýyty qaıyrymdylyq sharasyn ótkizdi. «Shymkent-qaıyrymdy qala» akıtsııasy aıasynda zaýyt ujymy qala aýmaǵyndaǵy Juldyz, Jalyn, Qarabastaý eldimekenderinde turatyn az qamtylǵan otbasylarǵa qoldaý kórsetti, dep habarlaıdy QazAqparat tilshisi.

Mereke qarsańynda muqtaj degen 25 januıaǵa eń qajetti degen azyq-túlik sebetinı úlestirdi. Óz kezeginde aýyl turǵyndary da ózderine qoldaý bildirgen zaýyt ujymyna alǵystaryn bildirdi.

«Halqymyz qashanda qaıyrymdylyq jasaýdy paryz sanap, qınalǵanǵa qol ushyn berýden tartynyp qalmaǵan. Igi is-sharany uıymdastyrǵan azamattarǵa shynaıy alǵystarymyzdy bildiremiz. Kúndelikti tutynatyn un, ósimdik maıy, kúrish, qant qaı qaısymyzǵa bolsa da artyqtyq etpeıtini belgili», - deıdi Qarabastaý aýylynyń turǵyndary.

Aıta keteıik, munaı óńdeý zaýytynyń ujymy óndiris ornyna jaqyn ornalasqan Juldyz turǵyn alabyndaǵy mektepterge on jyldan beri áleýmettik qoldaý kórsetip keledi. Oqý jylynyń qarsańynda aýyldaǵy eki mektepke 12 mln teńgeniń oqý tehnıkalyq quraldaryn alyp berip, áleýmettik az qamtylǵan jáne tolyq emes otbasylarynan shyqqan balalarǵa mektep formalaryn tartý etken bolatyn.