Shymkenttiń emhanalarynda qurylǵan arnaıy top 15 myń naýqasqa qyzmet kórsetken

ShYMKENT. QazAqparat – Shymkentte jedel-járdem qyzmetinen bólek mobıldik top táýlik boıy qyzmet kórsetip keledi. Emhanalar janynan qurylǵan 58 mobıldi top búgingi kúnge deıin 15 myń naýqastyń úılerine baryp, medıtsınalyq kómek kórsetken, dep habarlaıdy QazAqparat tilshisi.

Bastapqy medıtsınalyq sanıtarlyq kómek kórsetý tobynyń jetekshisi Jibek Seıdalınanyń aıtýynsha, shaqyrtýlardyń basym bóligi salqyn tııý men dene qyzýynyń kóterilýi, qurǵaq jótelge baılanysty bolǵan.

«Eki aýysymmen jumys isteıtin medıtsına mamandary bir kúnde 15-ten astam naýqasty qaraıdy jáne telefon arqyly keńester beredi. Dárigerler patsıenttiń úıine barysymen dene qyzýyn ólshep, tamaǵyn qarap, ókpesin tyńdaıdy. Eger naýqastyń jaǵdaıy aýyr bolsa, kezekshi aýrýhanaǵa jetkizedi. Sonymen birge, mobıldi brıgada qyzmetimen dıspanserlik esepte turatyn 38 556 azamatqa dári-dármek úılerine jetkizildi»,-dedi Jibek Seıdalına.

Budan bólek, mobıldi brıgada dıspanserlik esepte turǵan 474 444 azamatqa qońyraý shalyp, juqpaly aýrýdyń aldyn alý boıynsha keńester berdi. Atqarylǵan jumystar qaladaǵy epıdemıologııalyq jaǵdaıdyń jaqsarýyna óz áserin tıgizgen.