Shymkenttiń Ál-Farabı aýdanynda ataýly áleýmettik kómekke 8762 otbasy ótinish tapsyrǵan
Bul týraly aýdan ákimi Ǵabıt Máýlenqulov BAQ ókilderimen kezdesýi barysynda málimdedi, dep habarlaıdy QazAqparat tilshisi.
Aýdan ákiminiń sózinshe, búginde AÁK ataýly áleýmettik kómekti zańsyz alǵan otbasylardy anyqtaý boıynsha 5073 otbasyǵa qaıta tekserý júrgizilgen. Aýdanda sondaı-aq, QR «Óńirlerdi damytýdyń 2020 jylǵa deıingi» baǵdarlamasyna sáıkes turǵyn úılerdi jóndeý jumystary júıeli túrde júrgizilip keledi.
«Aýdan aýmaǵyndaǵy 672 kópqabatty turǵyn úılerdiń 40%-y (269) eskirgen úıler. Atap aıtqanda, 1935-1940 j.j aralyǵynda-11 úı, 1941-1960 j.j-128 úı, 1961-1980 j.j-282 úı, 1981-2000j.j-251 turǵyn úıdiń qurylystary júrgizilgen. Turǵyn úı-kommýnaldyq sharýashylyǵyn jańǵyrtý men damytýdyń 2011-2020 jylǵa deıingi» baǵdarlamasyna sáıkes 2011 jyldan bastap jalpy 56 kópqabatty turǵyn úıge kúrdeli jóndeý jumystary júrgizilip, 2019 jyldyń basynan 5 úıge kúrdeli jóndeý jumystary júrgizildi»,- dedi Ǵabıt Máýlenqulov.
Aýdan ákiminiń aıtýynsha, aldaǵy ýaqytta qarjy qaralǵan jaǵdaıda usynys bildirgen 44 kópqabatty turǵyn úıge kúrdeli jóndeý jumystaryn júrgizýge tıisti basqarmaǵa usynys joldandy. Joǵaryda kórsetilgen eski úıler boıynsha, 2015-2017 jyldarǵa arnalǵan «Shymkent qalasy boıynsha seısmonyǵaıtý jumystaryn júrgizýdi qajet etetin kópqabatty turǵyn úılerdiń baǵdarlamasyna» sáıkes 10 úıge seısmonyǵaıtý jumystary júrgizilip, qosymsha 124 úıdi atalǵan baǵdarlamaǵa sáıkes qaıta jóndeý jumystaryn júrgizýge usynyldy.