Shymkenttiń 2200 jyldyǵyna daıyndyq qalaı júrip jatyr

NUR-SULTAN. QazAqparat – Shymkent qalasynyń ákimi Erlan Aıtahanov qalanyń 2200 jyldyǵy men «Shymkent – 2020 jylǵy TMD mádenı astanasy» sharalaryna daıyndyq qalaı júrip jatqanyn aıtyp berdi, dep habarlaıdy QazAqparat tilshisi.

«2020 jyly qalamyz Táýelsiz Memlekettik Dostastyǵy elderiniń mádenı astanasy bolyp jarııalanǵan. Odan bólek, kelesi jyly Shymkent qalasynyń 2200 jyldyq mereıtoıy TMD elderi men UNESCO kóleminde atalyp ótedi. Búgingi tańda osy ataýly is-sharalarǵa daıyndyq jumystary bastaldy. Bıyl 502 mln teńgege eski qala - Tsıtadeldi qalpyna keltirý jumysy qarqyndy júrip jatyr. Jumystar kelesi jyldyń qyrkúıek aıynda tolyq aıaqtalady», - dedi Shymkent qalasynyń ákimi OKQ-da ótken baspasóz máslıhatynda.

Ákimniń aıtýyna qaraǵanda, 2020 jyly Ortalyq ıppodrom aýmaǵynda «Qaıyrymdy qala – Shymkent» etnoaýyly uıymdastyrylady. Etnoaýylda naýryz aıynan bastap qarasha aıyna deıin Ulttyq halyq shyǵarmashylyǵyn qoldaý baǵytynda ár senbi, jeksenbi kúnderi is-sharalar ótkiziledi.

«Odan bólek, kelesi jyly qalanyń sáýletin arttyratyn 2200 oryndyq kongress-holl, oqýshylar saraıy jáne medıa-ortalyq qurylysy júrgiziledi», - dedi ol.