Shymkenttikter saıası qýǵyn-súrgin qurbandaryn eske aldy

ShYMKENT. QazAqparat - Shymkenttegi «Qasiret» memorıalynda saıası qýǵyn-súrgin jáne asharshylyq qurbandaryn eske alýǵa arnalǵan is-shara ótti. Solaqaı saıasattyń qurbany bolǵan babalar rýhyn eske alǵan urpaq memorıalǵa jınalyp, qazaq tarıhyndaǵy eń qaraly kezeń shyndyǵyn aıtty, dep habarlaıdy QazAqparat tilshisi.

Qaraly jıynda taǵdyrdyń qatal synaǵyna ushyraǵan bozdaqtarǵa qurmet kórsetildi. Qala ákimi Ǵabıdolla Ábdirahymov pen qala ardagerleri eskertkishke gúl shoqtaryn qoıyp, taǵzym etti.

«Jyldar jyljyǵan saıyn derekter de jańarýda. Oqyǵany úshin oqqa ushyp, bilgeni úshin jazalaý lagerlerine aıdalǵan arystarymyzdyń qatary kún sanap tolyǵyp otyr. Náýbetti jyldarda bizdiń aımaqtyń 7 myń oǵlany kisenge alynyp, 2 jarym myńy atý jazasyna kesilgen. Bir áýlettiń búkil urpaǵy qýǵyndalǵan oqıǵalar da kezdesedi. Biz tarıhtaǵy osynaý zobalań jyldardy umytpaýymyz kerek. Ótken tarıhtyń aýyrtpalyqtarynan sabaq alyp qana alǵa qadam basamyz. Beıbit ómirdiń qadirin bileıik»,- dedi qala ákimi Ǵabıdolla Ábdirahymov.

Saltanatty jıynda kópshilik jazyqsyzdar rýhyn bir mınýt únsizdikpen eske aldy. Babalar keshken qaıǵyly sátter teatrlandyrylǵan kórinister arqyly kórsetilip, sahnalandyrylǵan qoıylym qoıyldy. Jınalǵandar babalar rýhyna quran baǵyshtap, ótken kúnge salaýat aıtty.