Shymkenttikter Olımpıada oıyndarynyń júldegerlerin qoshemetpen qarsy aldy
20:07, 10 Tamyz 2021
ShYMKENT.QazAqparat - Karateden XXXII Jazǵy Olımpıada oıyndarynyń júldegerleri Darhan Asadilov pen Sofıa Berýltseva týǵan jerge oraldy.
Shymkent qalasynyń halyqaralyq áýejaıynda jeńimpaz sportshylardy jerlesteri zor qoshemetpen qarsy aldy, dep habarlaıdy QazAqparat tilshisi.
Qala ákimi Murat Áıtenov ǵalamdyq básekede júldeger atanǵan sportshylardy áýejaıdan qarsy alyp, jerlesterimizdi jarqyn jeńisimen quttyqtady. Tórt jyldyqtyń basty básekesinde el úmitin aqtaǵanyn, aldaǵy dúbirli dodalarda odan da joǵary jetistikterge jetýlerine sáttilik tiledi. Saıypqyran sportshylarǵa demeýshi azamattardyń atynan temir tulpardyń kiltin tabys etti.
Aıta ketsek, Tokıo Olımpıadasynda Shymkent qalasynan 10 sportshy baq synaǵan bolatyn. Karate sportynan Darhan Asadilov pen Sofıa Berýltseva jartylaı fınalǵa deıin jetip, qola júldeger atandy.