Shymkenttikter «EKSPO - 2017» kórmesine daıyndyqtaryn pysyqtaýda
Oblystaǵy týrıstik fırmalardyń basshylary men saqtandyrý kompanııasynyń ókilderi, sondaı-aq salyq salasynyń qyzmetkerleri qatysqan jıynda ońtústiktiń halyqaralyq kórmege daıyndyǵy pysyqtaldy, dep habarlaıdy QazAqparat HAA tilshisi.
Semınarda týrızm baǵytyndaǵy arnaıy beınerolık pen úsh tilde jaryq kórgen «Shymkentke qosh keldińiz!» jýrnal-katalogynyń tanystyrylymy ótti. Jýrnalda oblys ortalyǵyndaǵy qonaq úıler men meıramhanalar, mádenı nysandar men tarıhı oryndardyń mekenjaılary, baılanys telefondary jarııalanǵan. Saıabaqtar men oıyn-saýyq jáne saýda ortalyqtary týraly da mol maǵlumat berilgen.
Jıynda týrıstik kompanııa ókilderi elordadaǵy kórmege baryp-qaıtý bıletiniń quny týraly, saıahatshylarǵa bar jaǵdaı jasalatynyn atap ótti. Al, týrızm ortalyǵy mamandary óńirge keletin saıahatshylarǵa týrıstik baǵyttar belgilengenin jetkizdi. Ol úshin arnaıy gıdter daıyndalýda eken. Dese de, shym shahardaǵy qonaqúılerdiń baǵasy kompanııa ókilderiniń alańdaýshylyǵyn týǵyzyp otyr.
«Bizden sheteldik saıahatshylar qonaq úıler men ózge de qyzmet túrleriniń baǵasyn aldyn ala jiberýimizdi suraıdy. Biraq, olardyń ótinishin qanaǵattandyra almaı otyrmyz. Sebebi, qonaq úıler baǵany jıi ózgertedi. Naqty bekitilmegendikten túsinbestik oryn alyp, jumysymyzǵa keri áserin tıgizýde. Oblystaǵy tarıhı oryndarǵa avtobýs jaldaý quny da qymbat», - deıdi týrfırma ókilderi.
Jergilikti jolaýshy tasymaldaý kompanııasy ókilderi de qyzmet kórsetý aqysyna baılanysty týyndaǵan máselelerdi ortaǵa saldy.
«Bizdiń kompanııanyń avtobýstary jańa ári yńǵaıly. Jolaýshylardyń quqyǵy qorǵalady. Saqtandyrylǵan. Biraq, kólikke qajetti janarmaı men qosalqy bólshekterdiń quny ózgerýi múmkin. Sondyqtan aldyn ala baǵany belgileı almaımyz. Biraq, týrıstik fırmalarmen birlesip jumys isteýge daıynbyz», - dedi «Ontustik Tulpar» tasymaldaý kompanııasy dırektorynyń orynbasary Nurjan Dosaev.
Al, qonaq úıler men týrıstik fırmalardyń basshylary salyq kólemi men kásipkerlik jónindegi suraqtaryn qoıyp, sharýalardy aqyldasyp sheshý jóninde ýaǵdalasty. Aldaǵy ýaqytta «EKSPO - 2017» kórmesine daıyndyq barysy jáne týrızmdi damytý baǵytyndaǵy usynystar men pikirler qala ákimdigi tarapynan qoldaýǵa ıe bolmaq.