Shymkenttik paraqor 120 myń teńge alǵany úshin 3 mln teńge aıyppul tóleıdi

NUR-SULTAN. QazAqparat - QR Veterınarııalyq baqylaý jáne qadaǵalaý komıtetiniń Shymkent qalasy boıynsha aýmaqtyq ınspektsııasy basshysynyń mindetin atqarýshy para alǵany úshin sottaldy, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń Shymkent qalalyq departamentiniń málimetinshe, aýmaqtyq ınspektsııa basshysynyń mindetin atqaryp kelgen I. S. Naqypbekovke qatysty sotqa deıingi tergeý aıaqtalǵan.

«Ol úı janýarlaryna veterınarlyq sertıfıkat bergeni úshin 120 myń teńge kóleminde para alǵan bolatyn. 30 shilde kúni Shymkent qalasynyń Abaı aýdandyq sotynyń úkimimen aıyptalýshyǵa 3 mln teńge kóleminde aıyppul salyndy. Ol soma sot úkimi zańdy kúshine engen kúnnen bastap 1 aı ishinde ótelýi tıis. Tólenbegen jaǵdaıda jaza bas bostandyǵynan aıyrý sharasyna aýystyrylady. Ol ómir boıy memlekettik qyzmette jumys isteý quqyǵynan aıyryldy», - delingen departamenttiń málimetinde.