Shymkenttik oqýshylar latyn álipbıin tasjolǵa túsirdi

 ShYMKENT. QazAqparat - Shymkentte 2500-den astam oqýshy jańa álipbıdi qoldap, fleshmob uıymdastyrdy. «Shymkent sıtı» qalashyǵynda uıymdastyrylǵan «Qosh keldiń, qazaq álipbıi!» sharasynda jetkinshekter tasjolǵa sýret saldy, dep habarlaıdy QazAqparat tilshisi.

Qala ishindegi bolashaq qalashyqta ótken is-sharada oqýshylar asfalt jáne molbertke sýret salý konkýrsyna qatysty. Munda jas sýretshiler týyndylarynyń kórmesi ótti. Oqýshylar latyn álipbıindegi ár dybysty ózinshe beıneledi. Osylaısha, jerge jańa alfavıtti salyp shyqty. Buǵan qosa aýla klýbtarynyń tárbıelenýshileri men qalanyń bı ujymdarynyń qatysýymen fleshmob ótti. Shymkenttiń bolashaqtaǵy beınesin óz qıyldarymen sýretteýge tyrysty.

Aıta keteıik, «Shymkent sıtı» jobasy 2015 jyly Shymkent qalalyq máslıhatynyń sessııasynda tanystyrylǵan. Joba boıynsha 427 gektar aýmaqta 70 myń turǵynǵa shaqtalǵan qala ishindegi qala boı kóteredi. Mundaǵy qurylys 2016 jyly bastaldy. Qazir bul aýdanda kommýnaldyq jeliniń, 7 jol men 20 úıdiń qurylysy aıaqtalyp qaldy. Aldaǵy ýaqytta munda kóp qabatty 316 úı salynyp, jalpy aýdan 12 oramǵa bólinedi dep josparlanýda. Áleýmettik mekemeler - mektepter, balabaqshalar men úlken saıabaq ta salynady.