Shymkenttik azamat qyzǵanyshtan burynǵy súıiktisiniń kúıeýin uryp óltirdi
Shymkentte adam ólimine kúdikti azamat «izin sýytpaı» qolǵa tústi Avtory Aqmaral Mahambetáli 13 Qyrkúıek 2023 j., 16:00 jarııalanǵan 64
12 qyrkúıek kúni saǵat 12:30 shamasynda polıtsııanyń «102» arnasyna kópqabatty úıdiń kireberisinde jergilikti turǵyndy soqqyǵa jyqqany týraly habarlama keldi. Shaqyrtý túsken mekenjaıǵa Turan aýdanynyń polıtseıleri men jedel járdem bardy.
Medıtsına qyzmetkerleri 35 jastaǵy azamattyń qaıtys bolǵanyn málimdedi. Jedel tergeý toby jábirlenýshini onyń birge turatyn áıeliniń burynǵy súıiktisi qyzǵanysh ústinde uryp-soqqanyn anyqtady.
Qarsylasynyń esinen tanyp qalǵanyn baıqaǵan qaskúnem dereý oqıǵa ornynan qashyp ketken. Krımınaldyq polıtsııa basqarmasynyń qyzmetkerleri kúdiktiniń syrt kelbeti men jeke derekteri kórsetilgen baǵdardy alyp, ony shuǵyl izdeýge kiristi. Jedel ýákil Arman Arıpjanov qylmyskerlerdi izdestirý boıynsha óziniń tájirıbesine súıene otyryp, qashyp ketken adam birinshi kezekte jeke zattary men qujattaryn alý úshin úıine barady dep boljady.
Kúdiktiniń Túrkistan oblysy Lenger qalasynyń turǵyny ekendigin jáne onyń avtokóliginiń joqtyǵyn bilgen jedel ýákil birden taksı júrgizýshileriniń turaǵyna bardy. Júrgizýshilerdiń biri izdeýdegi er adamǵa uqsas tulǵa jańa ǵana Alphard-qa minip ketkenin habarlady. Polıtsııa qyzmetkeri dereý onyń izine túsip, kólikti Toǵys eldi-mekeninde toqtatyp, er adamdy ustady.
Ustalǵan adam polıtsııa departamentiniń ýaqytsha ustaý ızolıatoryna qamaldy. Qazirgi tańda QR QK-niń 106-baby 3-bóligi (Aaısyzda jábirlenýshiniń ólimine ákep soqqan densaýlyqqa qasaqana aýyr zııan keltirý) boıynsha sotqa deıingi tergeý júrgizilip jatyr.