Shymkentten Rıdderge gýmanıtarlyq júk tıelgen 2 kólik attandy

ShYMKENT. QazAqparat - Shymkenttikter Rıdderde órtten zardap shekkenderge kómek qolyn sozdy. «Qaıyrymdy ister marafony» jalpyulttyq jobasy aıasynda órtten zardap shekken Rıdder qalasy Leshoz kentiniń turǵyndaryna gýmanıtarlyq júk tıelgen 2 kólik jolǵa shyqty, dep habarlaıdy QazAqparat tilshisi.

Qala jastarynyń bastamasymen uıymdastyrylǵan qaıyrymdylyq shara barysynda sóz alǵan qala ákiminiń birinshi orynbasary Shyńǵys Muqan belsendi jastarǵa alǵysyn bildirip, attanatyn jol kerýenine sáttilik tiledi.

«Jastardyń belsendiligi, eldiń yntymaǵy, aýyzbirshiligi jaıbaraqat kezde emes, osyndaı eldiń basyna qıyndyq túsken kezde kórinedi. Qala jastary birigip, Rıdderdegi jerlesterimizge kómektesip, halyq arasynda úndeý tastap, 2 júk kóligimen gýmanıtarlyq kósh-kerýendi jasaqtaǵan eken. Buǵan qalamyzdaǵy kásipkerler de úles qosty. Olar zardap shekken otbasylaryna qajetti turmystyq zattardy jiberip jatyr. Memlekettiliktiń mánin túsinip, ıgi iske atsalysqan barsha azamattarǵa, qala jastaryna shahar basshysy Murat Dúısenbekulynyń atynan zor alǵys aıtamyz», - dedi qala ákiminiń birinshi orynbasary.

Sondaı-aq izgi sharaǵa qalalyq aýyl sharýashylyǵy jáne veterınarııa basqarmasynyń basshysy Asqar Qanybekov, qurylys basqarmasynyń basshysy Erbol Ahmetov jáne Murat Joldyqojaev, Asqar Álimbekov, Nursultan Balabıev syndy azamattar belsendi qoldaý kórsetken. Munan bólek «Bal Tekstıl» 50 kilem jetkizse, birqatar kásipker azamattar zardap shekken otbasylarǵa azyq-túlikpen qatar qysqa tolqyndy pesh, ydys-aıaq jibergen. Aıta keteıik, 2021 jylǵy 10 mamyrda Shyǵys Qazaqstan oblysy Rıdder orman sharýashylyǵynda órt shyqqan bolatyn. Tilsiz jaýdan zardap shekken turǵyndarǵa kómek kórsetý aldaǵy ýaqytta da jalǵasady.