Shymkenttegi «Jeńis» saıabaǵynda «Poezııa buryshy» ashyldy

ShYMKENT. QazAqparat – Qazaqstan Respýblıkasynyń Tuńǵysh Prezıdenti Nursultan Nazarbaevtyń «Uly dalanyń jeti qyry» baǵdarlamasy aıasynda Shymkenttegi «Jeńis» saıabaǵynda ádebı-mádenı «Poezııa buryshynyń» ashylý saltanaty ótti, dep habarlaıdy QazAqparat.

Aıta ketken jón, jaqynda ǵana qala ákiminiń bastamasymen ádebıet salasynda qalamyn ushtap júrgen shyǵarmashyl jastardyń úzdik týyndylary jınaqtalǵan «Jańa ǵasyr áýenderi» atty jas aqyndar antologııasy jaryq kórgen edi.

Al «Poezııa buryshynda» aldaǵy ýaqytta qala turǵyndary arasynda mádenıetti nasıhattaý men damytýǵa baǵyttalǵan ádebı keshter, jazýshylar jáne aqyndarmen kezdesýler, shyǵarmashylyq is-sharalar men fılosofııalyq dárister ótkiziletin bolady.

Saltanatty jıynǵa Shymkent qalasy ákimi Erlan Aıtahanov arnaıy kelip, qalamger jastarǵa ystyq lebizin jetkizip, shyǵarmashylyq shabyt tiledi.

Kesh qonaǵy QR Memlekettik syılyǵynyń laýreaty, QR eńbek sińirgen qaıratkeri, QR Jazýshylar odaǵynyń tóraǵasy Ulyqbek Esdáýlet sóz alyp, quttyqtaýyn jetkizdi.

Jıyn sońynda jyr ólkesine nyq qadam basqan Súndet Seıitov, Araılym Muratalıeva, Maqpal Tórebek jáne ózge de jas aqyndarǵa úlkender sáttilik tiledi.