Shymkenttegi jas býyn latyn álipbıine kóshýdi qoldaıdy

ShYMKENT. QazAqparat - Shymkent qalasynyń belsendi jastary jaqynda Prezıdentke usynylǵan latyn álipbıiniń sońǵy úlgisi týraly oı almasyp, jańa álipbıdiń ereksheligin ortaq talqyǵa saldy, dep habarlaıdy «QazAqparat».

Latyn álipbıiniń jańa jobasyn Shymkent jastary qyzý talqylap jatyr. Tipti sózden iske kóship, ózara aqparat almasýda latyn álipbıin qoldanýdy bastap ketken. «Aqıqat» jastar pikir saıys ortalyǵynyń tóraǵasy Juman Janseriktiń aıtýynsha, álipbıdiń sońǵy nusqasyn meńgerýde aıtarlyqtaı kúrdelilik joq.

«Óz basym latyn grafıkasymen jazýdy qolǵa aldym. Aqparattyq portaldardaǵy jańalyqtardyń barlyǵyn usynylǵan sońǵy úlgide jazyp júrmin. Birden úırenip ketpesem de, pernetaqtada jańa álipbıdiń áripteri arqyly kez kelgen mátin ońaı teriletin sekildi. Sońǵy nusqadaǵy tól tańbalarymyzdy apostroftarmen jazý yńǵaıly dep esepteımin. Jáne «bir árip - bir dybys» qaǵıdatynyń saqtalǵanyn qoldaımyn», - deıdi Juman Janserik.

Al «Qazaqstan jastar Kongresiniń» OQO-daǵy ókili Aıgúl Erǵalıqyzynyń pikirinshe, aldyńǵy jobaǵa qaraǵanda álipbıdiń sońǵy nusqasy áldeqaıda tıimdi. Óıtkeni, ol oqyǵanǵa da, jazǵanǵa da yńǵaıly. Aıgúl Erǵalıqyzy sońǵy nusqany qoldanysqa engizýde kóp ýaqyt qajet etpeıtinin aıtady.

Latyn álipbıin qoldaý baǵytynda oblystyq «Jastar resýrstyq ortalyǵynyń» qyzmetkeri Tańsholpan Tileýqabylqyzy da óz oıymen bólisti.

«Eń aldymen jastarǵa yńǵaıly nusqasyn tańdaý kerek dep esepteımin. Ǵylym men bilimge den qoıǵan jastardy da nazardan tys qaldyrmaý kerektigin eskergen abzal. Aldyńǵy nusqasynda túsiniksiz jaıttar bolǵany kórer kózge kórinip turatyn. Menińshe, sońǵy nusqasy durys. Óıtkeni ony keıbirimiz kúndelikti habarlamalalarda da qoldanyp júrmiz», - deıdi Tańsholpan Tileýqabylqyzy.