Shymkenttegi «Romantic» gúl dúkeninde eki bólek oqıǵa bolǵan - ІІM túsindirmesi

ASTANA. QazAqparat - Shymkenttegi «Romantic» gúl dúkeninde bolǵan oqıǵa úlken qoǵamdyq rezonans týdyrdy. Osyǵan baılanysty QRR ІІM bul jerde eki quqyq buzýshylyq jaıty bolǵanyn málimdedi, dep habarlaıdy QazAqparat.

«Birinshi beınejazbada kórsetilgendeı, aq fýtbolka kıgen adam ústelden qaıshyny alyp, gúl satýshyǵa qaraı bet alady. Bul jaıt 8 tamyz kúni bolǵan. Atalǵan jaǵdaıǵa qatysty polıtsııaǵa satýshydan eshqandaı aryz túsken joq. Quqyq buzýshylyq áleýmettik jelilerdi monıtorıng jasaý barysynda anyqtaldy.

Polıtsııa qyzmetkerleri buzaqyny anyqtap, Turan APB-na jetkizdi. K. esimdi azamat 1990 jyly týǵan Túrkistan oblysynyń týmasy bolyp shyqty. Shymkent qalasynda turady. Onyń ákesi - 1952 jyly týǵan zeınetker. Báıdibek aýdanynda turady» delingen habarlamada.

Er adam sot qaýlysymen QR ÁQBtK-niń 434-babyna «Usaq buzaqylyq» sáıkes 7 táýlikke qamaýǵa alynǵan.
Sondaı-aq, BAQ-tarda onyń keshirim suraǵan vıdeosy taraǵan edi.
Ekinshi beınejazbada basqa 1989 jyly týǵan B. esimdi azamat beınelengen. Ákesi joq, anasy zeınetker.
«Aǵymdaǵy jyldyń 8 mamyrynda er adam florıstti qorlap, dúkennen gúl shoǵyn alyp ketken.
Turan APB-nyń 102 arnasyna janjal týraly qońyraý túsken. Oqıǵa ornyna ýchaskelik ınspektorlar barǵan. Alaıda dúken ıesi mán-jaıdy naqtylaý barysynda eshkimge shaǵymy joqtyǵyn aıtyp, aryz jazýdan bas tartqan.
Bul jaıtqa qatysty Turan APB-da QR QK-niń 191-baby 2-bóligi 1-tarmaǵymen «Jábirlenýshiniń ómirine n/e densaýlyǵyna qaýipti emes kúsh qoldanyp tonaý» sotqa deıingi tergeý bastaldy» delingen habarlamada.
Sondaı-aq istiń aq-qarasyn ajyratý kezinde qara fýtbolka kıgen azamat aǵymdaǵy jyldyń 19 mamyrynda otbasylyq sebepterge baılanysty óz ótinishimen ishki ister organdarynan bosatylǵan Qarataý APB-nyń burynǵy qyzmetkeri ekeni anyqtaldy.

Aıta keteıik, búǵan deıin gúl dúkenindegi qoqan-loqyǵa qatysty Shymkent prokýratýrasy túsinik bergenin jazǵan edik.