Shymkenttegi reformalarǵa syn kózben qaramaýǵa shaqyramyn - qala ákimi

ShYMKENT. QazAqparat - Shymkentte alǵash ret qalalyq úkimettik emes uıymdarynyń forýmy ótti. Oǵan Shymkent qalasynyń ákimi Ǵabıdolla Ábdirahymov qatysyp, atqarylyp jatqan jumystarǵa qatysty syn-pikirlerge óz oıyn bildirdi, dep habarlaıdy QazAqparat tilshisi.

Ǵabıdolla Ábdirahymovtyń «Azamattyq qoǵam jáne memleket: Dıalog. Áriptestik. Senim» atty forýmynda sóılegen sózinen vıdeoúzindi ákimdiktiń Feısbýktegi paraqshasynda ornalastyryldy.

«Qala turǵyndaryn ákimdik júrgizip jatqan kez kelgen reformaǵa syn kózben qaramaýǵa shaqyrar edim. Biz qala úshin, qoǵam úshin  jasalyp jatqan barlyq jumystardy kórsetkimiz-aq keledi. Ol jumystardy qoǵam baǵalasa deımiz. Áıtpese, Eıfel munarasy sııaqty jasap qoısań, mindetti túrde kemshiligin tabady: «Jasyl túspen boıaǵan durys edi, qońyr qylyp qoıypty» deıdi. Jasamasań «ne úshin jasamaǵan» dep shyǵady. Qazir áleýmettik jelilerdegi pikirlerdi oqysań, kileń jaǵymsyz dúnıeni jazady», - dedi Ǵabıdolla Ábdirahymov.

Shahar basshysynyń aıtýynsha, adamdar jarqyn keleshekke senip, ómirge pozıtıvpen qaraǵany abzal.

«Keıde, dıvanda jatyp pikir aıtatyndarǵa: «Bireýdi kinálamas buryn, óziń uıqydan turǵanda tósek ornyńdy jınaısyń ba? Ózińnen keıin ishken keseńdi jýyp qoıasyń ba?» dep suraǵym keledi. Bizdiń qazirgi maqsatymyz - qala turǵyndarynyń ómirge, jumys isteýge qushtarlyǵyn arttyrý, sondaı-aq jarqyn keleshekke senimin oıatý, erteńgi kúni budan da jaqsy bolatynyn uǵyndyrý», - dedi Shymkent qalasynyń ákimi.