Shymkenttegi OQMÝ ýnıversıteti QazUAÝ-men áriptestigin nyǵaıtty
Kezdesý barysynda QazUAÝ rektory Tilektes Espolov otandyq agroónerkásiptik kesheninde bilim, ǵylym jáne óndiris ıntegratsııasyn damytý máselesin qozǵap, osy taqyryp aıasyndaǵy izdenisteri men usynystaryn ortaǵa salyp, arnaıy dáris oqydy. Taraptar ózara pikir almasyp, eki ýnıversıtet aralyǵyndaǵy jan-jaqty yntymaqtastyq baılanysty nyǵaıtý jóninide ýaǵdalasty. Ózara tájirıbe almasý máselelerin talqylap, eki ýnıversıtet arasyndaǵy áriptestik baılanystardy nyǵaıtýǵa jańa jol ashatyn memorandýmǵa qol qoıdy. Mazmundy kezdesý aıasynda M.Áýezov atyndaǵy Ońtústik Qazaqstan memlekettik ýnıversıtetiniń rektory, QR UǴA akademıgi Darııa Qojamjarova QazUAÝ basshysyna «M.Áýezov atyndaǵy Ońtústik Qazaqstan memlekettik ýnıversıtetiniń Qurmetti professory» ataǵyn berdi. Kelgen qonaqtarǵa jyly lebizin bildirip, Qazaq ulttyq agrarlyq ýnıversıtetiniń álemdik deńgeıdegi ýnıversıtetke transformatsııalaný strategııasyn tıimdi iske asyrýdaǵy ilgeri qadamdaryna tabys tiledi.
Aıta keteıik, Qazaq ulttyq agrarlyq ýnıversıteti aýylsharýashylyq mamandaryn daıyndaý jáne biliktiligin arttyrý baǵdarlamasyn ázirleıtin Qazaqstandaǵy aldyńǵy qatarly joǵary mektep retinde sanalady. Sondaı-aq, ǵylym men bilimdi kommertsııalandyrý, tehnologııalar transfertin ekojúıemen ózara árekettesýdi jedeldetetin Agrotehnologııalyq jáne Sýsharýashylyǵy Haby bolyp otyr. Al, M.Áýezov atyndaǵy Ońtústik Qazaqstan memlekettik ýnıversıteti ońtústik óńirde ǵana emes, elimizdegi ǵylymı-bilim berý jáne ınnovatsııalyq ortalyqqa aınaldy. Oqý ornynda 2018-2019 oqý jylynda 700 mıllon teńgeden astam somada 45 granttyq ǵylymı joba júzege asyrylǵan. Onyń ishinde 300 mıllıon teńgeden astamy - ǵylymı, ǵylymı-tehnıkalyq qyzmet nátıjelerin kommertsııalandyrýǵa arnalǵan. Ýnıversıtet QS álemdik reıtınginiń TOP-500 quramynda 491 orynǵa ıe. Ulttyq reıtıngterdiń nátıjeleri boıynsha ýnıversıtet elimiz boıynsha úzdik kópprofıldi joǵary oqý oryndarynyń úshtigine kiredi.