Shymkenttegi Naýryz merekesinde alǵash ret tazy-tóbet jarysy men shógen oıyny kórsetildi

ShYMKENT. QazAqparat - Búgin Ońtústik jurtshylyǵy Ulystyń uly kúnin Shymkent qalasynda atap ótti.  Naýryz merekesine oraı munda  jańa arbat ashyldy. Saltanatty sharaǵa qatysqan oblys ákimi Janseıit Túımebaev shahar turǵyndaryn jańa demalys ornynyń ashylýymen quttyqtady, dep habarlaıdy  QazAqparat tilshisi.

 Mereke qaladaǵy Ortalyq atshabardaǵy ulttyq sport oıyn túrlerinen ótken jaryspen jalǵasty. Atap aıtqanda, kókpar, báıge, qyz qýý oıyndary jınalǵan jurttyń delebesin qozdyrdy.
 

 Bıylǵy Naýryz meıramyndaǵy saıystyń ereksheligi alǵashqy ret taı jarysy men qysqa qashyqtyqtaǵy at jarysy ótti. Sondaı-aq, qonaqtar jamby atý, aýdaryspaq, teńge ilý,  tazy-tóbet jarysy, qoshqar kóterý syndy saıystardy tamashalady. Ulttyq oıyndar da shet qalmady, ásirese, umyt bola bastaǵan shógen oıyny alǵash ret kórsetilip, kópshilikti tamsandyrdy.  Búrkit salý syndy qusbegilik óner kórsetildi. Kókpar jarysynyń aqtyq syny ótti. Aqtyq saıysta  Qazyǵurt pen Shymkenttiń shabandozdary jarysyp, nátıjesinde Shymkent qalasynyń quramasy 1-oryndy ıelendi. 2-oryn Qazyǵurtqa, 3-oryn Túlkibas, 4-oryn Maqtaral aýdanyna buıyrdy. Al asyq atý saıysynda Qarabaev Almastyń asyǵy alshasynan tústi. Marapattaý sátinde úzdikterge baǵaly syılyqtar usynyldy.