Shymkenttegi kópqabatty úılerde ózin-ózi basqarý júıesi engiziledi
Atalǵan semınarda kondomınıým nysanyn basqarýdaǵy uıymdastyrýshylyq, quqyqtyq, qarjylyq jáne energııa saqtaý aspektileri, sonymen birge kóp páterli turǵyn úılerde ıntelektýaldy basqarý júıesin qoldaný máseleleri sóz boldy. Osy jıynda seriktestik dırektory aldaǵy ýaqytta qala ákimdigi men turǵyn úı ıeleri arasynda úshjaqty kelisimshart jasalyp, tıisti jumystar júrgiziletinin jetkizdi. Búginde shahardaǵy tórt aýdannan 21 kóppáterli úıde pılottyq joba qolǵa alynǵan. Ábdimalik Balbaevtyń sózinshe, oǵan jertólelerdi, dálizderdi tazalaý, jaryqtandyrý, kópqabatty úı aýmaǵynyń tazalyǵy men kireberis esikterdiń jaǵdaıyn baqylaý sekildi jumystar kiredi. Turǵyndardyń aı saıyn tólegen aqshasy aǵymdaǵy jóndeý jumystaryna jumsalady. Al kondomınıým obektisiniń ortaq múlkin kútip-ustaýǵa aı saıynǵy jarnanyń ortasha mólsheri 1 sharshy metrden 20 teńge 67 tıyndy quraıdy. Kondomınıým obektisiniń ortaq múlkin kúrdeli jóndeýge aı saıynǵy jarnanyń ortasha mólsheri de qarastyrylǵan. Aı saıynǵy kommýnaldyq tólemge qosymsha tólenetin bul qarajatty turǵyndar qala ákimniń turǵyn úı qatynastary bóliminiń saıtynan baqylap otyra alady. Bul joba kópqabatty úılerdi basqarý júıesin ońtaılandyrýdyń 2020 jylǵa deıin óńirlerdi damytý baǵdarlamasy aıasynda júzege asyrylmaq. Basty maqsat - shahardaǵy kópqabatty páterlerdegi ózekti máseleleriniń sheshimin tabý.
Baǵdarlamaǵa sáıkes, qazirgi tańda kópqabatty úılerdiń ózin-ózi basqarý jobasy usynylýda. Ár kópqabatty úıdiń turǵyndary úı ıeleriniń birlestigin quryp, úı tóraǵasyn saılaı otyryp, úıdi basqarýshy kompanııany tańdaýǵa quqyly. Jańa júıe boıynsha árbir páter ıeleriniń birlestigi tarapynan jeke shot ashylýy tıis. Ondaǵy atqarylatyn, úılerdi kútip ustaý jumystaryn uıymdastyrý basqarýshy kompanııa júzege asyrady. Aıta keteıik, qazirgi tańda mundaı tájirıbe elimizdegi Astana men Almaty qalalarynda sátti júzege asýda.