Shymkenttegi etnoaýylda eki myń lıtr naýryz kóje taratyldy
Dýmandy merekege kelgen qonaqtar arnaıy ázirlengen naýryz kójeden dám tatty. Etnoaýylda 2 tonna kóje pisirilip, qonaqtarǵa taratyldy.
«Biz Naýryz merekesin toılaý úshin Shymkentke arnaıy keldik. Shymkenttiń adamdary da aýa raıy sekildi jyly eken. Búgingi ıppodromdaǵy mereke joǵary deńgeıde uıymdastyrylǵan. Jyl saıyn naýryzdy osynda toılaýdy josparlap otyrmyz», - deıdi Petropavl oblysynan kelgen qonaq Fatıma Qadirova.
Sondaı-aq, qazaqtyń ulttyq oıyndarynan kókpar, teńge ilý, alaman báıge, qazaq kúresi jáne sadaq atý saıystary ótti. Ulttyq sporttan báseke qyzyp, altybaqanda terbelgen jastar án saldy.
Naýryz merekesi aıasynda barmaǵynan bal tamǵan aspazdar da synǵa tústi. «DámDásTour» festıvali aıasynda qalaǵa tanymal 50-ge jýyq tamaqtaný orny — meıramhana, kofehana, samsahanalar, fast-fýd, balmuzdaq, shaıhanalar qatysyp, ózderiniń avtorlyq mázirlerin usyndy. Eki kún boıy saıysqa túsken aspazdar «Naýryzkóje», «Káýap», «Palaý» jáne «Samsa» nomınatsııalary boıynsha úzdikterdi anyqtady. Sondaı-aq, kelgen qonaqtarǵa qalamyzda dástúrge aınalǵan «Shymkent sháıi» taratyldy.