Shymkentte jyr jattaýdan jeńimpaz atanǵan oqýshy 1 mln teńge jeńip aldy

ShYMKENT. QazAqparat – Shymkentte «Qazaq Epos» respýblıkalyq aǵartý jobasynyń «Tulpar minip, tý alǵan!» baıqaýy uıymdastyrylyp, oqýshylar jyr jattaýdan jarysty. Baıqaýǵa 116 mektepten myńnan asa oqýshy men 600-den asa muǵalim qatysyp, 12 bala aqtyq kezeńge ótti, dep habarlaıdy QazAqparat tilshisi.

Rýhanııat dodasy respýblıka boıynsha 6-10-synyp oqýshylarynyń arasynda ótti. Baıqaý aıasynda qatysýshylar 132 bet — 5206 joldan turatyn «Qobylandy batyr» jyrynyń Marabaı jyraý nusqasyn jatqa aıtyp, jyrdyń ishindegi kónergen jáne tarıhı sózderdiń maǵynasyn ashýǵa tyrysty. Sondaı-aq, qazaq tili men ádebıeti oqýlyǵy boıynsha ázirlengen suraqtarǵa jaýap berdi. Jıynda sóz alǵan «Qazaq Epos» respýblıkalyq aǵartý jobasynyń jetekshileri aldaǵy ýaqytta mundaı rýhanı sharalar óz jalǵasyn tabatynyn jetkizdi.

Baıqaý qorytyndysymen qalalyq kezeńde 1-oryndy Saltanat Maqsut jeńip alyp, oǵan 1 mln teńge tapsyryldy. Jetekshisi Aıgúl Ábdimatovaǵa 2 mln teńge tabystaldy.

Al, 2-oryndy Qaraqat Qonarbaeva ıelenip, oǵan da 600 myń teńge berildi. Jetekshisi Qurbankúl Kúlbekovaǵa 1 mln 200 myń teńgeniń sertıfıkaty tapsyryldy.

3-oryn alǵan Ásel Ábdiker 300 myń teńge, jetekshisi Bıbaısha Sadyqova 600 myń teńge ıelik etti. Oǵan qosa jeńimpazdar Shymkent qalasy ákiminiń arnaıy dıplomymen marapattaldy. Saıysta júzden júırik, myńnan tulpar atanǵan oqýshylar men olardyń ustazdaryn búgin qala ákimi Erlan Aıtahanov marapattady.

«Elbasynyń «Rýhanı jańǵyrý» baǵdarlamasy bizge serpin berdi. Onyń bir dáleli - «Qobylandy batyr» jyryn jatqa aıtý boıynsha uıymdastyrylǵan – baıqaý. Urpaq tárbıeleýde batyrlar jyryn oqytý, ony qaıta jańǵyrtý ıgi bastama dep bilemin. Biz atadan qalǵan syrly sózder men baı muramyz arqyly jańǵyramyz. «Tulpar minip, tý alǵan!» sekildi jobalar negizinde boıyna baǵa jetpes rýhanııat sińirgen, ulttyq rýhy myqty urpaq ósetinine bek senimdimin», - dedi Erlan Aıtahanov.