Shymkentte Joldaý mindetterin júzege asyrý máseleleri talqylandy

ShYMKENT. QazAqparat – Shymkent qalasynyń mamandandyrylǵan aýdanaralyq ekonomıkalyq sotynda QR Prezıdenti Qasym-Jomart Toqaevtyń Qazaqstan halqyna Joldaýynyń mindetterin iske asyrý máselelerin talqylaý taqyrybynda dóńgelek ústel otyrysy ótti, dep habarlaıdy QazAqparat tilshisi.

Májiliske sot tóraǵasy men sýdıalar, Shymkent qalasy boıynsha Memlekettik kirister departamenti zań basqarmasynyń basshysy, aýdandyq Memlkettik kirister basqarmalarynyń bólim basshylary, «Azamattarǵa arnalǵan úkimet memlekettik korporatsııasy» KEAQ-niń jáne BAQ ókilderi qatysty. Basqosýda atalmysh sottyń tóraǵasy Málik Maısaqanov Joldaýdyń negizgi baǵyttaryna toqtalyp, Memleket basshysy belgilegen zaman talabyna saı tıimdi memleket qurýdaǵy memlekettik organdardyń rólin erekshe atap ótkenin jetkizdi. Sonymen qatar, ol azamattardyń barlyq syndarly ótinish-tilekterin jedel ári tıimdi qarastyratyn «Halyq únine qulaq asatyn memleket» tujyrymdamasyn iske asyrýdy mindettedi.

«Qoǵamdyq dıalog, ashyqtyq, adamdardyń muń-muqtajyna jedel nazar aýdarý memlekettik organdar qyzmetiniń negizgi basymdyqtary bolyp sanalady. Prezıdenttiń Qazaqstan halqyna Joldaýynda belgilengen ózekti bir másele, ákimshilik ádilet qurylymyn engizý bolyp tabylady. Azamattar jarııa-quqyqtyq daýlarda bılik organdarynyń sheshimderi men áreketterine qatysty shaǵym túsirý kezinde kóp jaǵdaıda teńsizdik ahýalynda qalyp jatady. Olardyń múmkindikterin memlekettik apparattyń resýrstarymen salystyrýǵa kelmeıdi», – dedi M.Maısaqanov.

Qatysýshylar májilistiń ózektiligin atap ótip, bul kezdesý memlekettik apparattyń tıimdiligin kóterý baǵytynda problemalyq máselerdi kóterýge múmkindik beretinin aıtty.