Shymkentte janarmaı baǵasy qymbattady
Baǵasyn tym kóterip jibergen beketterdiń biri - «Gazpromneft». Munda qazir AI-92 benzıni lıtrine - 141, Aı-95 - 153 teńgeden satylýda. Al, «QazMunaıGaz» kompanııasy eń suranysqa ıe benzındi lıtrine 137-den 139 teńgege deıin qymbattatqan.
Sol sııaqty qaladaǵy ózge janarmaı quıý beketterinde de baǵanyń kúrt óskeni baıqalady. «Sinooil» men «Satti Zhol» beketterinde AI-92 benzıni 140 teńge dep belgilense, Aı-95 152 teńgege turaqtaǵan. Kishigirim beketterde halyq kóp tutynatyn janarmaı baǵasy ortasha eseppen 137-138 teńge bolsa, Aı-95 - 150 teńge. Júrgizýshiler óz kezeginde dızel otynynyń da baǵasy birshama óskenin aıtady.
Baǵanyń qymbattaýyna baılanysty janarmaı beketteriniń qojaıyndary óz ýájderin aıtyp otyr. Oblystaǵy «Janar-jaǵar maı» qaýymdastyǵynyń tóraǵasy Qaıypbek Qambarovtyń sózinshe Shymkenttegi munaı óńdeý zaýyty benzınniń kóterme baǵasyn 4 teńgege kóterip jibergen.
«Baǵany kótergenimizge búgin úshinshi kún. Buryn zaýyttan AI-92 markaly benzınniń tonnasyn 152 myń teńgeden alsaq, qazir oǵan 5 myń teńge artyq tóleýdemiz. Sebebi, zaýyt baǵany solaı kórsetip otyr. Al, dızel otynynyń baǵasy 122 myń teńgeden 127 myń teńgege bir-aq kóterildi», - deıdi Q.Qambarov.
Janar-jaǵar maı satýshylardyń pikirinshe, baǵany ustap turý úshin aldymen zaýyttan bosatylatyn benzın kólemin retteý qajet. Sonda ǵana baǵa júıelenedi.
«Janar-jaǵar maı satatyn kompanııalar ákimdikke aı saıyn suranys jasap, sol suranys boıynsha zaýyttan benzın, dızel otynyn alady. Alaıda sońǵy kezde sol suranystarymyz bola tura, alatyn benzın kólemi azaıyp bara jatyr. Máselen, bir aıǵa 150 tonna surasaq, 120-130 alamyz. Sodan keıin ol shyǵynymyzdy aqtamaıdy. Baǵany kóterýge týra keledi», - deıdi qaýymdastyq tóraǵasy.
Eske salaıyq, ótken jyldyń qyrkúıek aıynda elimizdiń Úkimeti tarapynan AI-92/93 janar-jaǵar maılarynyń baǵasyna memlekettik retteý bolmaıtyndyǵy týraly sheshim qabyldanǵan bolatyn.