Shymkentte jańadan salynǵan stýdentter jataqhanasy paıdalanýǵa berildi

ShYMKENT. QazAqparat – Búgin Shymkent qalasynyń ákimi Erlan Aıtahanov Ońtústik Qazaqstan memlekettik pedagogıkalyq ýnıversıtetiniń stýdentterine arnalǵan jańa jataqhanany saltanatty túrde ashty, dep habarlaıdy QazAqparat tilshisi.

Іs-sharaǵa OQMPÝ rektory Anar Qaıyrbekova men Túrkistan oblystyq máslıhatynyń depýtaty, QR UǴA korrespondent-múshesi Ońalbaı Aıashev qatysty.

240 oryndyq jańa ǵımaratty stýdentterge tapsyrǵan qala basshysy bul jumystar Elbasynyń 5 áleýmettik bastamasy aıasynda jastardyń sapaly bilim alýy úshin jasalyp jatqan jumystardyń bir parasy ekenin atap ótti.

«Elbasy 2023 jylǵa deıin barlyq stýdentterdi jataqhanamen qamtý týraly tapsyrma bergen bolatyn. Shymkenttegi jataqhana qajettiligin joıý boıynsha jumys atqaryp jatyrmyz. Máselen, osy jyly búgingi 240 jáne 350 oryndy eki jataqhananyń qurylysy aıaqtalyp, Ońtústik Qazaqstan memlekettik pedagogıkalyq ýnıversıtetine paıdalanýǵa berildi. Kelesi jyly «Shymkent» ÁKK arqyly 2 500 oryndyq jataqhana salý josparlanyp otyr», - dedi Erlan Aıtahanov.

Atalǵan oqý ordasynyń jaratylystaný fakýltetiniń stýdentteri jaıǵasatyn jataqhana Shymkent qalasyndaǵy «Nursát» shaǵynaýdanynda ornalasqan. Jańa ǵımarat zamanaýı talaptarǵa saı qajetti qural-jabdyqtarmen qamtylǵan. Kitaphanasy men oqý zaly, demalys bólmesi, medıtsınalyq pýnkt, as bólmesi de bar.