Shymkentte jańa turǵyn úı kesheni paıdalanýǵa berildi
Kópqabatty turǵyn úıdegi páterdiń kilti «Nurly jer» baǵdarlamasy boıynsha 72 otbasyǵa berildi. Jańa úıler «Nurly jer» turǵyn úı qurylysy baǵdarlamasy aıasynda «Samuryq Qazyna» AQ jáne «Aqmoınaq» JShS qarajattary esebinen birlesip salyndy. Jalpy atalǵan turǵyn úı kesheninde úsh qabatty 36 pəterli eki úı, bes qabatty 48 pəterli eki turǵyn úı boı kótergen.
Saltanatty sharaǵa qatysqan oblys ákimi Janseıit Túımebaev jańa páterlerge qonystanǵan árbir shańyraqqa bereke birlik tiledi.
«Elbasynyń jarııalaǵan «Bes áleýmettik bastama» atty úndeýiniń barlyq baǵyttary boıynsha oblysta tıisti jumystar atqarylýda. Osy úndeýdiń birinshi baǵyty «7-20-25» baǵdarlamasyn óńirde sátti júzege asyrý úshin osy jyly jeke salýshylar arqyly 104 kópqabatty turǵyn úıdiń qurylysy júrgizilýde. Onyń ishinde 16 turǵyn úı jyl qorytyndysymen paıdalanýǵa berilip, barlyq páterlerdi «7-20-25» baǵdarlamasy arqyly taratý kózdelýde», - dedi oblys ákimi.
Aıta keteıik, elimizde jarııalanǵan bes áleýmettik bastamanyń nátıjesinde jeke ınvestorlar oblysta turǵyn úı qurylysyn salýǵa qyzyǵýshylyq tanytýda. Aǵymdaǵy jyldyń sáýir aıynda quny 7,9 mlrd teńgeni quraıtyn 14 kópqabatty turǵyn úı (768 páter, 53,2 myń sh.m.) qurylysyna ekinshi deńgeıli bankten nesıe alǵan jeke qurylys salýshyǵa Óńirlik úılestirý keńesiniń sheshimimen 7 paıyzdyq sýbsıdııa berý qoldaý tapty. Atalǵan turǵyn úı qurylysy aǵymdaǵy jyly paıdalanýǵa beriledi. Sondaı-aq aldaǵy ýaqytta Shymkent qalasynda turǵyn úı qurylysyn qarqyndy júrgizý maqsatynda kóptegen joblalardy iske asyrý josparlanyp otyr.