Shymkentte zańsyz saýda dúńgirshikteri súrilip jatyr
30 shilde kúni tańerteń Tóle bı kóshesine polıtsııa qyzmetkerleri, ákimdik ókilderi men saýdagerler jınaldy. Súrilgen 34 saýda núktesiniń ornyna qala bazarynan oryn usynylyp otyr.
Bul jóninde sot sheshim shyǵaryp, ol 18 shildede kúshine engen. Kásipkerlerge múlikterin kóshirip áketýi úshin birshama ýaqyt berilgen. Tóle bı kóshesiniń boıyndaǵy retsiz saýda oryndaryn joıý baǵytyndaǵy qolǵa alynǵan jumystardyń nátıjesi juma kúni, 27 shildede ótken brıfıngte málim etilgen.
«Shymkent qalasynyń ákimdigi retsiz saýda ıeleri úshin 150 áleýmettik oryn berý týraly «Qyrǵy bazar» JShS-nyń basshylyǵymen kelisimge kelip otyr. Kelisimge sáıkes, atalmysh kásipkerler alǵashqy úsh aı merziminde bazar ishindegi saýda oryndaryn jalǵa alýdan jáne salyq tóleýden bosatylmaq», - dedi qalalyq TKSh basqarmasy basshysynyń mindetin atqarýshy Nurlan Bektursynov.
Aıta keteıik, Tóle bı kóshesiniń boıyndaǵy retsiz saýda oryndarynyń ahýaly birneshe jyldar boıy ózekti máselege aınalǵan edi. Saýda qatarlary men dúńgirshekter jaıaý júrginshiler jolyn, sonymen qatar úlken joldyń boıyn basa ornalasyp, jol-kólik qozǵalysyna aıtarlyqtaı kedergi keltiretin.