Shymkentte úlken saıabaq salynyp jatyr

ShYMKENT. QazAqparat - Shymkenttegi Shymkent City shaǵyn aýdanynda jańa saıabaqtyń qurylysy júrip jatyr, dep habarlaıdy QazAqparat Otyrar.kz saıtyna silteme jasap.

Jalpy jańa qalashyqtyń aýmaǵy - 20,4 gektar. Búginde shaǵyn aýdandy ınfraqurylymmen qamtý jumystary tolyq júrgizilýde.

Buǵan deıin «Shymkent City» aýmaǵynyń damý josparyna 15 ınvestor tartylyp, turǵyn úı qurylystary qarqyn alǵan. Sondaı-aq, zamanaýı ǵımarattar, bıznes keńseler, ákimshilik-iskerlik ortalyqtar salýǵa syrttan da ınvestıtsııalyq jobalar tartylǵan.

Sonymen qatar munda jeke ınvestorlardyń qarjylandyrýymen jańadan 300-ge jýyq kóp qabatty turǵyn úı, árqaısysy 1200 oryndyq 3 mektep, balabaqshalar, emhana, saıabaq jáne kongress-holl qurylystary júrgizilýde.

Saıabaq qurylysyna kelsek, nysanda kógaldandyrý alańy 164 000 sharshy metrdi quraıdy. Munda 53 balalar oıyn alańshasy, 19 sporttyq alań ornalasatyn bolady.

Sondaı-aq, 2,8 shaqyrymdyq velojol, jasandy kól salynyp, 5 myńnan asa aǵash kósheti, 7 myńnan asa gúl, 6 myń buta egý josparlanǵan. Qala ákimi Murat Dúısenbekuly qala kelbeti taǵy bir saıabaqpen kómkerile túsetinin, qalany jasyl jelekke bóleý arqyly shahar tynysy ashyla túsetinin aıtyp ótti.

Nysan 2025 jyly paıdalanýǵa beriledi dep kútilýde.