Shymkentte TÚRKSOI sýretshileriniń kórmesi ashyldy

ShYMKENT. QazAqparat - Ońtústik Qazaqstan oblystyq beıneleý óneri mýzeıinde «Túrkistan - túrki áleminiń mádenı astanasy» aıasyndaǵy HH-shy TÚRKSOI uıymyna múshe elder sýretshileri plenerinde salynǵan jumystardyń qorytyndy kórmesiniń ashylý saltanaty ótti. Tabıǵat aıasynda salynǵan 135 keskindemelik jumys kórme zalyna ilinip, kópshilikke usynyldy, dep habarlaıdy QazAqparat HAA tilshisi.

Túrki áleminiń qylqalam sheberleri Elbasy N.Nazarbaevtyń «Bolashaqqa baǵdar: Rýhanı jańǵyrý» maqalasy aıasyndaǵy «Týǵan jer» baǵdarlamasyn júzege asyrý jáne «Túrkistan - túrki áleminiń mádenı astanasy» jyly aıasynda Qoja Ahmet ıAsaýı men Arystan bab kesenelerinde, Otyrar aýdanyndaǵy tarıhı, mádenı eskertkishterde, Han taǵy jáne Qarataý qoryǵy aýmaǵy men Báıdibek aýdanynyń Aqmeshit, Qostura, Domalaq ana kesenelerinde, Qazyǵurt aýdany men Saıram - Ógem taý shatqaldary jáne Shymkent qalasynyń kórikti jerlerinde etıýdtik jumystar jasady. Ońtústiktiń kıeli, tarıhı mekenderin maıly boıaýmen kenep betine beınelegen sýretshiler boıamasyz sulýlyqqa baı ólkeniń tabıǵatyna degen tańdanystaryn da jasyra almady.
 

Kórmeni qorytyndylaý sharasynda oblystyq mádenıet basqarmasynyń basshysy Nurbolat Ahmetjanov pen TÚRKSOI uıymy sýretshileriniń uıymdastyrýshysy Sanjar Mehmet qylqalam sheberlerin arnaıy alǵys hattar jáne syılyqtarmen marapattady.
 

Aıta keteıik, bir aptaǵa sozylǵan plenerge 9 memleketten, ıaǵnı, Túrkııa, Ózbekstan, Qyrǵyzstan, Reseı Federatsııasy, Bosnııa-Gertsegovına, Ýkraına, Bolgarııa, Moldavııa, Bashqurstan, Ázerbaıjan elderinen 15 sýretshi kelgen bolatyn. Al, elimizdiń Astana, Almaty, Pavlodar, Shymkent qalalarynan 13 kásibı sýretshiler jáne Qazaqstannyń eńbek sińirgen qaıratkerleri, QR Kórkem akademııasynyń músheleri men óner professorlary qatysqan edi.