Shymkentte TMD-ǵa múshe memleketterdiń Jastar forýmy bastaldy

ShYMKENT. QazAqparat – Shymkentte TMD-ǵa múshe memleketterdiń Jastar forýmy ótýde. Bul basqosý kommýnıkatıvti pikirsaıys alańyn qurý men TMD-ǵa qatysýshy memleketterdiń jas kóshbasshylary arasyndaǵy mádenıaralyq dıalogty qalyptastyrý jáne jastar uıymdary men jas kóshbasshylardy biriktirý maqsatynda uıymdastyrylyp otyr, dep habarlaıdy QazAqparat tilshisi.

QR Aqparat jáne qoǵamdyq damý mınıstrliginiń qoldaýymen jáne «Bizben birge» qoǵamdyq qorynyń uıymdastyrýymen ótip jatqan basqosýda TMD-ǵa múshe memleketterdiń ulttyq jastar uıymdary men qaýymdastyqtarynyń tıimdi yntymaqtastyǵyn damytýǵa yqpal etý máseleleri talqylandy. Sondaı-aq, jastar úshin ashyq jumys alańyn uıymdastyrý men TMD-ǵa múshe memleketterdiń jas kóshbasshylarymen qarym-qatynasy úshin jaǵdaı jasaý jaıy qamtyldy.

Týrızm, eriktilik, kóshbasshylyq, qoǵamdyq jáne saıası ómirdegi túrli saladaǵy jastardyń quzyrettilikterin berý úshin úzdik sarapshylardy tartý máseleleri sóz boldy.

TMD qatysýshy memleketterdiń Jastar forýmy sonymen qatar ınnovatsııalyq ıdeıalardy júzege asyratyn, qoǵam men memlekettiń ózekti máselelerin sheshýge baǵyttalǵan, sondaı-aq, kreatıvti jas urpaqty áleýetin damytýǵa baǵyttalǵan biregeı alańǵa aınaldy.

Forýmǵa qatysýshylar óz tájirıbelerin bólisý maqsatynda túrli taqyryptar boıynsha pikir almasyp, tájirıbe almasýda. Atap aıtar bolsaq, «Volonterlik – ómir salty retinde», «Bıznes blogıng», «Áleýmettik shyndyq», «Shyǵarmashylyq sheberhana» atty 4 sektsııa boıynsha pikirsaıystar ótkizilýde. Elimizdegi Jastar jyly aıasynda uıymdastyrylǵan shara eki kúnge, ıaǵnı 24-25 qazan aralyǵynda jalǵasady dep josparlanǵan.