Shymkentte Táýelsizdik kúni 558 otbasy jańa páterge qonystandy
«Nurly jer» turǵyn úı qurylys baǵdarlamasynyń ekinshi baǵyty boıynsha salynǵan turǵyn úıdiń kólemi 31,5 myń sharshy metrdi qurady. Jańa páterler Qurylys jınaq bankiniń salymshylary men jergilikti atqarýshy organda kezekte turǵan azamattarǵa berildi. Al, Ákimshilik-iskerlik ortalyǵynda paıdalanýǵa berilgen 9 qabatty 48 páterli eki turǵyn úıdegi baspanalardyń kiltin Ońtústik Qazaqstan oblysynyń ákimi Janseıit Túımebaev tabys etti. Aımaq basshysy barsha turǵyndardy jańa qonyspen quttyqtady.
«Elimizde turǵyndardy baspanamen qamtý máselesi júıeli túrde júrgizilýde. Búginde memleket qoldaýynyń nátıjesinde oblysymyzda baspanaǵa qoly jetip, qonys toıyn toılap jatqandardyń qatary az emes. Máselen. Osy jyly «Nurly jer» turǵyn úı baǵdarlamasy aıasynda Shymkent qalasynda 83 turǵyn úıdiń ıaǵnı 5052 páterdiń qurylysy bastalǵan bolatyn. Búgin merekesi qarsańynda osy turǵyn úılerdiń 11-i, ıaǵnı, 558 páter berilip otyr. Jyl sońyna deıin taǵy da arendalyq 1152 páter bolatyn 16 turǵyn úıdiń qurylysyn paıdalanýǵa tapsyrý josparlanýda. Demek, osy aıdyń ózinde qanshama otbasy qonys toıyn toılamaq. Bul egemendi elimizdiń jemisi dep bilemin», - dep aıtty Janseıit Hanseıituly.
Aıta keteıik, aǵymdaǵy jyly barlyq qarjylandyrý kózderi arqyly oblysta 279 turǵyn úıdiń qurylysy júrgizilýde. Jyl sońyna deıin atalǵan úılerdiń 109-nyń ıaǵnı 5893 páterdiń qurylysyn aıaqtap, tapsyrý josparlanyp otyr.