Shymkentte sybaılas jemqorlyqqa qarsy zańnamaǵa engizilgen ózgerister túsindirildi
Aıta keteıik, QR Prezıdenti Qasym-Jomart Toqaev halyqqa arnaǵan Joldaýynda sybaılas jemqorlyqpen jan-jaqty kúresý máselesin jáne saraptama júrgizý isin qaıta qalpyna keltirý qajettigin atap ótken bolatyn. Memleket basshysynyń joǵaryda atalǵan bastamalarynyń aıasynda qala ákimi Erlan Aıtahanov jetekshilik etetin uıymdarda sybaılas jemqorlyqtyń aldyn alý boıynsha sapaly jumysty qamtamasyz etýdi, sondaı-aq, óńirdegi memlekettik qyzmetkerler arasynda zańdy keńinen túsindirýdi jáne sybaılas jemqorlyqqa qarsy qyzmet salasyn erekshe baqylaýǵa alýdy tapsyrdy.
«Bul zańnyń qabyldanýy Qazaqstanda sybaılas jemqorlyqqa qarsy kúrestiń jańa kezeńi bastalǵanyn bildiredi. Egemen elimizdiń tarıhynda tuńǵysh ret basshylardyń qol astyndaǵy qyzmetkerleri úshin jaýapkershiligi zańnamalyq deńgeıde bekitildi. Sonymen qatar, zańda basshylardyń baǵynyshty qyzmetkerlerine sybaılas jemqorlyq qylmysyn jasatpaýǵa, onyń aldyn alýǵa mindetti ekeni kórsetilgen», - dedi Erlan Aıtahanov.
Zańnamaǵa engizilgen jańa tolyqtyrýlardy Sybaılas jemqorlyqqa qarsy is-qımyl agenttiginiń Shymkent qalasy boıynsha departamentiniń basshysy A.Jumaǵalı jáne onyń birinshi orynbasary T.Serikbaev keńinen túsindirip ótti.
«Budan bylaı saıası memlekettik qyzmetshiler – mınıstrler men olardyń orynbasarlary, oblystardyń, Nur-Sultan, Almaty, Shymkent qalalary men oblys ákimderi men olardyń orynbasarlary, aýdan ákimderi tikeleı baǵynyshty qyzmetkerleri sybaılas jemqorlyq jasasa, mindetti túrde otstavkaǵa berýi tıis. Bul zań boıynsha basshylar baǵynyshty qyzmetkerlerine sybaılas jemqorlyq qylmysyn jasatpaýǵa, onyń aldyn alýǵa mindetti. Al mindet oryndalmaǵan jaǵdaıda basshy tártiptik jaýapkershilikke tartylady», - dedi A.Jumaǵalı.
Eske salaıyq, atalǵan zań memlekettik qyzmetshilerdiń jaýapkershiligin kóterýge baǵyttalǵan.