Shymkentte sý jaǵasynda balalaryn qaraýsyz qaldyrǵandar jaýapqa tartyldy

ShYMKENT. QazAqparat - Sýdaǵy jazataıym oqıǵalardy boldyrmaý maqsatynda Shymkent qalasy TJ departamenti Azamattyq qorǵanys basqarmasynyń qyzmetkerleri jergilikti polıtsııamen birlesip shomylýǵa tyıym salynǵan oryndarǵa patrýldeý júrgizdi, dep habarlaıdy QazAqparat.

Birlesken reıd Aqjar sý qoımasynyń boıynda jasaldy.

«Bul joly reıdke qatysýshylardyń erekshe nazary shomylýǵa kelgen jasóspirimderge aýdy. Osyndaı balalarmen profılaktıkalyq áńgimeler ótkizildi. Eresekterge jas balalardy qaraýsyz qaldyrýǵa jol bermeý týraly aıtyldy, al jasóspirimderge sý qoımalarynda qaýipsiz júris-turystyń negizgi erejeleri túsindirildi.

TJ departamentiniń qyzmetkerleri ÁQBtK-niń 412-baby «Sý aıdyndaryndaǵy qaýipsizdik erejelerin buzý nemese oryndamaý» boıynsha patrýldeý nátıjesinde 1 adamǵa hattama toltyryp, 7 AEK nemese 24 150 teńge mólsherinde aıyppul saldy», - dep jazdy vedomstvodan.

Sonymen qatar polıtsııa qyzmetkerleri tarapynan 3 adamǵa eskertý jasalǵan.