Shymkentte statsıonarlyq karantınde 218 adam jatyr

ShYMKENT. QazAqparat – Shymkentte jalpy sany 484 adam karantınge alynǵan, olardyń 218-i medıtsınalyq statsıonarlarǵa jatqyzyldy. Bul týraly qala ákiminiń birinshi orynbasary Erbol Sadyr málim etti, dep habarlaıdy QazAqparat tilshisi.

Qala ákiminiń birinshi orynbasarynyń aıtýynsha, sala mamandary úı karantıninde otyrǵan 266 adamnyń rejımdi qatań saqtaýyn qadaǵalaýda. Bul turǵyndardyń barlyǵy shetelden jáne Nur-Sultan men Almaty qalalarynan kelgen. Barlyǵynda dene qyzýy joǵary bolǵan.

«Qala ákiminiń tapsyrmasyna sáıkes, barlyq emhanalar ózinde esepte turatyn azamattarmen baılanysyp otyr. Olardyń densaýlyq jaǵdaıyn tekserip shyǵýda. Sondaı-aq, qalaǵa kelgen qonaqtardyń da barlyǵy ýaqytsha esepke tirkelip, olardyń densaýlyǵy baqylaýǵa alyndy. Eger turǵyndar men qonaqtarda dene qyzýynyń kóterilýi nemese koronovırýs ınfektsııasynyń basqa da sımptomdary anyqtalsa, olar dereý baqylaýǵa alynady», - dedi Erbol Sadyr.

Budan bólek, qalada medıtsınalyq betperde taǵyp júrý rejımi engizilgeni atap ótildi. Bul shekteýlerdi eskermegen, tótenshe jaǵdaı rejımi men sanıtarlyq talaptardy qasaqana buzǵan azamattarǵa qoldanystaǵy zańnamaǵa sáıkes aıyppul salynatyny eskertildi.

Spıkerdiń aıtýynsha, QR Ákimshilik quqyq buzýshylyq týraly kodeksiniń 476-babyna sáıkes, tótenshe jaǵdaı rejımin buzǵan azamattarǵa 10 AEK kóleminde aıyppul salynady. Eger bul quqyqbuzýshylyq taǵy qaıtalansa, sot sheshimimen 10 táýlikke deıin qamaýǵa alynýy múmkin.

«Shymkent qalasynda 2 adam koronavırýs ınfektsııasyn juqtyrǵany anyqtaldy. Osy eki azamat turatyn Táýelsizdikke 20 jyl eldimekeni 14 kúnge karantınge jabyldy. Bul eldimekenniń kireberisine blokposttar ornatyldy. Ondaǵy turǵyndar azyq-túlik, dári-dármek, aýyzsý jáne basqa da birinshi kezekte qajetti taýarlarmen qamtamasyz etilýde», - dedi Erbol Sadyr.