Shymkentte sheteldik ınvestorlardyń qatysýymen 15 joba júzege asyrylady
«Túrkistan» saraıynda ótken esepti kezdesýde ákim aldymen 2019 jyly qalanyń ekonomıkalyq jáne áleýmettik salalarynda atqarylǵan jumystar týraly baıandady.
Jıynǵa qatysqan bir myńnan astam turǵynnan bólek, shymkenttikter qala basshysynyń esebin qala ákimdiginiń resmı saıty men áleýmettik jelidegi facebook paraqshasynda tikeleı efır arqyly da tyńdady.
Ótken jyly qalada birshama jumystar atqarylǵanyn aıtqan qala ákimi josparly ındıkatorlarǵa qol jetkizilgenine toqtalyp ótti. Máselen, ónerkásip ónimi 2018 jylmen salystyrǵanda 15 paıyzǵa ósse, aýyl sharýashylyǵy ónimi 6,3 paıyzǵa, jańa turǵyn úıler 19,2 paıyzǵa, al, bólshek saýda 7,1 paıyzǵa artqan.
«Respýblıka boıynsha ındýstrııalyq-ınnovatsııalyq damý baǵdarlamasy iske asyrylýda. Baǵdarlama aıasynda Shymkentte 3 jylda 24 kásiporyn ashylyp, 1300 turaqty jumys orny paıda boldy. Al, ótken jyly «Alıans» kompanııasynyń jip ıirý fabrıkasy qaıta iske qosyldy. Ol birneshe jyldan beri toqtap turǵan edi. Qalada 2 ındýstrııalyq aımaq tıimdi jumys isteýde. Qazirgi tańda 64 mlrd teńge ınvestıtsııa tartylyp, 72 joba iske qosyldy. Osynyń esebinen 4 myńnan astam adam jumyspen qamtylyp, bıýdjetke 13,4 mlrd teńge salyq tústi»,- dedi M.Áıtenov.
Óz baıandamasynda Murat Dúısenbekuly aldaǵy 3 jylda sheteldik ınvestorlardyń qatysýymen keminde 15 joba iske asyrylyp, oǵan 2,5 mlrd AQSh dollary kóleminde sheteldik ınvestıtsııa tartylatynyn málim etti. Nátıjesinde 2 myńnan astam turǵyn jumyspen qamtylatyn bolady. Aýyl sharýashylyǵy salasynda atqarylǵan jumystarǵa toqtalǵan ákim ótken jyly 29 mlrd teńgeniń ónimi óndirilgenin jetkizdi. Onyń aıtýynsha, salaǵa sońǵy 3 jylda 2,6 mlrd teńge ınvestıtsııa salynyp, 56 gektar jerge jylyjaı jáne 215 gektar jerge qarqyndy baý egilgen. Al, etke 24 myń bas iri qara bordaqylanyp, 111 januıalyq sút fermasy ashylǵan. Bul maqsatqa bıýdjetten 3 mlrd teńge sýbsıdııa tólengen.