Shymkentte shala týǵan egiz sábılerdiń sany artqan

ShYMKENT. QazAqparat - Shymkentte jyl basynan beri 305 egiz dúnıege kelgen. Syńarymen týǵan shaqalaqtardyń basym bóligi – qyzdar, dep habarlaıdy QazAqparat tilshisi.

Ótken jylǵy kórsetkishpen salystyrǵanda egizder sany 100-ge artyq.

– Baıqasańyzdar, eki nemese odan da kóp syńardyń bir mezette egiz bolyp týýy barysynda júktilik merzimi qysqa, sábılerdiń salmaǵy qalypty jaǵdaıdan jeńilirek bolady. Sondyqtan bolar, egizderdiń kóbisi – shalabaılar. Shala týǵan sábıdi perzenthanadan birden shyǵarmaımyz. Týǵan kúnnen bastap bir aıǵa deıin kútim jasaımyz. Osy ýaqyt aralyǵynda anasy men sábıdiń densaýlyǵynda eshqandaı kinárat bolmasa, úıge shyǵýǵa ruqsat etemiz, - deıdi Shymkent qalalyq perınataldyq ortalyǵynyń dárigeri Janat Úsenbaeva.

Aıta keteıik, Shymkentte jyl basynan beri 5 úshem dúnege kelgen. Jalpy, 29 105 sábı dúnıe esigin ashypty.