Shymkentte saryshaıan kóbeıip ketti
Saryshaıandardyń kóbeıip ketkeni týraly vıdeolar áleýmettik jelide tarap jatyr. Jergilikti turǵyndar úı ishinen, kıim arasynan saryshaıandardyń shyǵyp jatqanyn aıtady.
Al, Shymkent qalasy densaýlyq saqtaý basqarmasynyń baspasóz qyzmeti jyl basynan beri qalalyq aýrýhanadaǵy toksıkologııa bólimshesine saryshaıan shaqqan 12 adamnyń júgingenin jetkizdi. Sondaı-aq, ýly jándik shaqqan bir adamnyń jaǵdaıy aýyrlap, aýrýhanaǵa jatqyzylǵan.
«Saryshaıandardyń kózi túnde jaqsy kóretindikten, qarańǵy mezgilde shaǵý qaýpi basym bolady. Sondyqtan, kúnniń ysıtyn mezgili endi bastalǵanyn eskersek, ásirese ashyq dalada abaı bolǵan jón. Sondaı-aq, sozylmaly aýrýy bar adamdardyń saryshaıan shaǵyp alýynan qaıtys bolatyn kezderi de kezdesedi. Sondyqtan da, jaz maýsymynda ýly jándiktiń shaǵýynan saqtanyńyzdar» - deıdi T. Orynbaev atyndaǵy gıperbarııalyq oksıgenatsııa ortalyǵynyń bas dárigeri Madına Ermahanbetova.