Shymkentte polıtsııa qyzmetkeriniń ózine qol salýyna baılanysty qylmystyq is qozǵaldy
Áleýmettik jelide jazba qaldyrǵan Shymkent qalalyq polıtsııa departamentiniń baspasóz hatshysy Móldir Bekeeva óz-ózine qol jumsamaq bolǵan.
«Men syndym... Sabyrym taýsyldy...» dep bastalatyn mátinde ol basshylyq tarapynan qysymǵa túskenin aıtqan.
Keshe túnde jedel járdemmen aýrýhanaǵa jetkizilgen ol jansaqtaý bólimine jatqyzylǵan. Dárigerler naýqastyń áli esin jımaǵanyn aıtyp otyr.
«6 sáýir túngi saǵat 01:30-da T.Orynbaev atyndaǵy gıperbarııalyq oksıgenatsııa ortalyǵyna jedel járdem qyzmetimen 1991 jylǵy patsıent aýyr jaǵdaıda jetkizilgen. Patsıentti dárigerler shuǵyl túrde tekserip, jansaqtaý bólimine jatqyzdy. Túsken kezdegi jaǵdaıy aýyr, komanyń І-dárejesi. Qazir naýqas reanımatsııada em qabyldaýda. Jaǵdaıy turaqty aýyr. Aldyn ala boljam boıynsha patsıent sýıtsıd jasaý maqsatynda kóp mólsherde dári ishken bolýy múmkin», - dedi qalalyq densaýlyq saqtaý basqarmasynyń baspasóz hatshysy Laýra Naqypqyzy.
Al, atalǵan jaıt boıynsha Shymkent qalalyq polıtsııa departamentiniń ózindik qaýipsizdik basqarmasy Qarataý APB QR QK 105-baby boıynsha sotqa deıingi tergeý amaldaryn bastaǵandyǵyn málimdedi.
Aıta keteıik, osydan birshama ýaqyt aldyn Shymkent qalasy polıtsııa departamenti baspasóz qyzmetiniń jetekshisi Móldir Bekeeva dep kórsetilgen aýdıojazba áleýmettik jelide tarap, talqyǵa túsken bolatyn.
Onda áıel adamnyń qyzmetkerine jekip sóılep, bylapyt sózder aıtqanyn estýge bolady.
Tipti jumystan bosatý jóninde másele qaraıtyndyǵyn jetkizgen daýys ıesi ádep normalaryn saqtamaı, aýzyna kelgen aǵat sózderdi qarsha boratqan.