Shymkentte polıtseıler óz-ózine qol jumsamaq bolǵan turǵyndy qutqardy
Eńbekshi APB-nyń «102» arnasyna 1 maýsym kúndizgi saǵat 11:15 shamasynda áıel kisi qońyraý shalǵan. Ol tártip saqshylarynan kómek surap, kúıeýiniń óz-ózine qol jumsaǵaly jatqanyn jetkizgen.
Belgili bolǵandaı, er adam jubaıyna beıneqońyraý arqyly baılanysqa shyǵyp, qoshtasqan. Shaqyrtý boıynsha, osy aýmaqqa qyzmet kórsetetin 3-rotanyń patrýldik polıtseıleri Aıdos Ismaılov pen Dáýren Raev oqıǵa ornyna jetti. Jedel kelgen tártip saqshylary qaqpa jabyq bolǵan soń, úıge kire almaǵan.
Ár sekýndtiń qymbat ekendigin eskergen Aıdos Ismaılov qorshaý arqyly asyp ótý úshin joǵaryǵa kóterilgen. Osy ýaqytta onyń seriktesi Dáýren Raev qulypty buzyp, qaqpadan kirgen. Patrýldik polıtsııa qyzmetkerleri aýmaqty tez arada sholyp, aýlanyń artqy jaǵynda qosalqy qurylystardyń arasynan arqanǵa ilingen adamdy tapty.
Sodan keıin Daýren, er adam tunshyǵyp qalmas úshin, ony kóterip, Aıdos arqandy kesip úlgergen. Medıtsına qyzmetkerleri de der kezinde kómek kórsetti. Qazirgi tańda, azamat aýrýhanada dárigerlerdiń baqylaýynda. Eńbekshi aýdandyq polıtsııa basqarmasynyń qyzmetkerleri oqıǵanyń barlyq mán-jaıyn anyqtap jatyr.