Shymkentte polıtseı anasy men qyzyn kólikpen qaqty: Balanyń jaǵdaıy belgili boldy

ShYMKENT. QazAqparat – Shymkentte polıtsııa qyzmetkeri kólikpen qaǵyp ketken kámeletke tolmaǵan qyzdyń jaǵdaıy ortasha aýyr, dep habarlaıdy QazAqparat tilshisi.

Oqıǵa 3 tamyz kúni Baıtursynov kóshesiniń boıynda bolǵan edi. Turan aýdandyq polıtsııa bóliminiń júrgizýshi-polıtseıi jaıaý júrginshiler ótkelinde eki adamdy – anasy men qyzyn qaǵyp ketti. Saldarynan ekeýi de túrli jaraqatpen aýrýhanaǵa jetkizildi.

7 tamyz kúni áıel esin jımastan jansaqtaý bóliminde qaıtys boldy. Osy kúni jol apatyna kináli polıtseı jumystan shyǵarylyp, ýaqytsha ustaý abaqtysyna qamalǵany habarlandy.

Dárigerlerdiń aıtýynsha qazir jasóspirim qyzdyń jaǵdaıy ortasha aýyr. Ol qalalyq klınıkalyq balalar aýrýhanasynda em qabyldaýda.

«Jabyq bas-mı jaraqatyn alǵan. Birneshe jerden aıaq-qoly zaqymdanǵan. Qazir emdeý hattamasyna sáıkes travmatologııa bóliminde em qabyldap jatyr», - dedi Shymkent qalasy Densaýlyq saqtaý basqarmasynyń baspasóz qyzmeti usynǵan aqparatta.