Shymkentte patrýldik polıtsııa polkiniń rota komandıri ustaldy

NUR-SULTAN. QazAqparat - Shymkentte patrýldik polıtsııa polkiniń rota komandıri ustaldy, dep habarlaıdy QR Sybaılas jemqorlyqqa qarsy is-qımyl agenttiginiń baspasóz qyzmeti.

«Jaqynda Shymkent qalasy Polıtsııa departamentiniń jergilikti polıtsııa qyzmeti patrýldik polıtsııa polkiniń 4-rota komandıriniń qylmystyq áreketi toqtatyldy.

Ol júıeli negizde qaramaǵyndaǵy qyzmetkerlerden qyzmeti boıynsha jalpy qamqorlyǵy úshin para aldy (Qylmystyq kodekstiń 366-baby boıynsha)» delingen habarlamada.

Málimetke saı, 27 sáýirinde Arnaıy jedel-izdestirý is-sharasy barysynda Shymkent qalasy PD ABB-men birlesip, qaramaǵyndaǵy qyzmetkerlerden kezekti para alǵannan keıin kúdikti ustalyp, ýaqytsha ustaý ızolıatoryna qamaldy.

29 sáýirde Shymkent qalasynyń mamandandyrylǵan tergeý soty oǵan qatysty «kúzetpen ustaý» túrindegi bultartpaý sharasyn sanktsııalady.