Shymkentte ózine qol jumsamaq bolǵan bozbala qutqaryldy
Oqıǵa 23 qarasha kúni saǵat 21:30 shamasynda bolǵan. 19 jastaǵy jigit Temirlan tasjoly men Mangeldın kóshesiniń qıylysyndaǵy kópirden sekirýge oqtalǵan. Baılanys quraldary arqyly shuǵyl aqparat alǵan 6506 áskerı bóliminiń jasaqtar boıynsha kezekshisi, aǵa leıtenant Serjan Saǵynbek birden shara qoldanady. Ol dereý qaramaǵyndaǵy jaýyngerler – efreıtor Nurdáýlet Orazbaev pen qatardaǵy Vıtalıı Kochetkovpen birlesip, habarlamada kórsetilgen mekenjaıǵa jyldam jetedi.
«Aıtylǵan jerge kelsek, rasymen de jas jigit kópirden ózin-ózi tastaýǵa daıyn tur eken. Birden oǵan bet alyp, raıynan qaıtarýǵa tyrystyq. Ol «Ómir súrgim kelmeıdi», «Ólgim keledi» dep aıqaılady. Eptep kópir qorshaýynyń bergi jaǵyna ótkizdik», - deıdi Serjan Saǵynbek.
Jedel ári kásibı túrde áreket etken áskerı qyzmetshiler jas jigitpen jaqynyraq sóılesip, bul nıetiniń durys emestigin túsindiredi. Sol mańnan ótip bara jatqan adamdar da jigitti bul áreketinen bas tartýǵa shaqyrady. Bozbalany tynyshtandyryp, oqıǵa ornyna kelgen tártip saqshylaryna tapsyrady. Іstiń mán-jaıyn anyqtaý maqsatynda 2003 jyly týǵan azamat Abaı aýdanynyń polıtsııa basqarmasyna jetkizildi.