Shymkentte otbasy qundylyǵyn nasıhattaý máselesi talqylandy

ShYMKENT. QazAqparat – Shymkentte qalalyq otbasy, balalar jáne jastar isteri jónindegi basqarmasynyń tapsyrysy boıynsha uymdastyrylǵan sharaǵa qatysýshylar búgingi otbasy qundylyǵyn saqtaý máselelerine qatysty óz oılaryn ortaǵa saldy, dep habarlaıdy QazAqparat tilshisi.

«Máńgilik el» qoǵamdyq birlestigi uıymdastyrǵan basqosýda Abaı aýdandyq sotynyń sýdıa-medıatory Erkin Otarbaev ajyrasý deńgeıin tómendetý men otbasylyq daýlardyń aldyn alý boıynsha qurylǵan «Otbasy keńesi» jumys tobynyń jumysy týraly baıandady. «Elbasy «Bolashaqqa baǵdar: rýhanı jańǵyrý» maqalasynda «Eger jańǵyrý eldiń ulttyq-rýhanı tamyrynan nár ala almasa, ol adasýǵa bastaıdy» dep ulttyq jańǵyrýdyń negizgi alǵysharttaryn aıqyndap berdi. Basqasyn aıtpaǵanda kóp balaly otbasylardy áleýmettik qorǵaý baǵytyndaǵy memlekettik járdemaqy túrleriniń ár jyl saıyn artyp, kóptaraptanyp kele jatqanyn ańǵarý qıyn emes. Ol halqymyzdyń tarıhymen birge qaınap, pisip shyqqan otbasylyq dástúrler, otbasy mádenıeti men etıkasy. Otbasynyń qalyptasýyna, qoǵamnyń qalyptasýy tikeleı baılanysty. «Áke – asqar taý, ana – móldir bulaq, bala – jaǵasyndaǵy quraq», degen danalyq sóz ulttyq tárbıeniń otbasylyq ómirde atqarar rólin aıqyndap turǵandaı. Qazaqtyń tarıhynda kıeli otbasynyń qasıetti urpaqtary týraly, olardyń el ómirindegi alatyn orny, sińirgen eńbegi, qaldyrǵan rýhanı baılyǵy, úlgi bolarlyq tirlikteri, ónegeli ómirleri qasterli sanalǵan. Sondyqtan bul másele qashanda kún tártibinen túspeýi tıis»,- dedi Erkin Otarbaev.